ကချင်ပြည်နယ် လိုင်ဇာမြို့အနီးရှိ လဂျားယန်ဒေသ၌ စစ်ကောင်စီတပ်ကို ကချင်လွတ်လပ်ရေးတပ်မတော်(KIA)က တိုက်ခိုက်ခဲ့ရာ စစ်ကောင်စီတပ် ထိခိုက်မှုများခဲ့ကြောင်း ကချင်ဒေသ စစ်ရေးသတင်းရင်းမြစ်က ပြောသည်။
ဇူလိုင် ၂၀ရက် ညနေပိုင်းတွင် ဗန်းမော်မှ နမ့်ဆန်ယာန်ဘက်သို့ စစ်ကူလာသည့် ခလရ(၇၈)တပ်ရင်း စစ်ကြောင်းကို KIAက ကြားဖြတ်တိုက်ခိုက်ခဲ့ခြင်းဖြစ်သည်ဟု ဆိုသည်။
“လိုင်ဇာနားရှိ လဂျားယန် ချောင်းတံတားကူးနေစဉ် KIA မှလက်နက်ကြီးများဖြင့် စောင့်ကြိုပစ်ခတ်သဖြင့် စကစအကြမ်းဖက်စစ်တပ် ထိခိုက်မှုများသွားတယ်”ဟု ကချင်ဒေသစစ်ရေးသတင်းရင်းမြစ်က ပြောသည်။
တိုက်ပွဲဖြစ်ပွားမှုနှင့်ပတ်သက်၍ KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံသို့ ဆက်သွယ်မေးမြန်းထားဆဲဖြစ်ပြီး သီးခြားအတည်ပြုချက် ဖြေကြားချက်မရသေးပေ။
နမ့်ဆန်ယာန်ဒေသတွင် ဇူလိုင်လဆန်းမှစတင်၍ တိုက်ပွဲဖြစ်ပွားခဲ့ရာ စစ်အင်အားဖြည့်တင်းနေသည့် စစ်ကောင်စီတပ်အား KIAက တိုက်ခိုက်မှုများ ဆက်တိုက်လုပ်ဆောင်နေ၍ တိုက်ပွဲများ မကြာခဏ ဖြစ်ခဲ့သည်။
