ဆိုင်းမင်း/People’s Spring
ပုသိမ်ထောင်မှာဖြစ်ပွားခဲ့တဲ့ အဓိကရုဏ်းမှာပါဝင်တယ်ဆိုတဲ့စွပ်စွဲချက်နဲ့ အကျဉ်းကျခံနေရတဲ့ နိုင်ငံရေးအကျဉ်းသား ၆၃ ဦးကို ထပ်တိုးထောင်ဒဏ်တွေ ချလိုက်တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်ထံသိရပါတယ်။
ထပ်တိုးထောင်ဒဏ်တွေကို ပြီးခဲ့တဲ့ သြဂုတ်လနဲ့ လက်ရှိစက်တင်ဘာလအတွင်းမှာ စစ်ကောင်စီရဲ့ထောင်တွင်းတရားရုံးက ချခဲ့တာလို့ အဲဒီကွန်ရက်ရဲ့တာဝန်ရှိသူ ကိုသိုက်ထွန်းဦးက ပြောပါတယ်။
Public Service Announcement
နိုင်ငံရေးအကျဉ်းသား ၆၃ ဦးထဲက ၂၆ ဦးကို ပြည်သူပိုင်ပစ္စည်းဖျက်ဆီးမှု နဲ့ ထောင် ၃ နှစ်စီ ၊ ကျန်တဲ့ ၃၇ ဦး ကို လည်း နိုင်ငံဝန်ထမ်းဟန့်တားနှောင့်ယှက်မှုနဲ့ ထောင် ၃ နှစ်စီ ထောင်တွင်းတရားရုံးက အမိန့်ချခဲ့ပါတယ်။
အဲဒီလို ထပ်တိုးထောင်ဒဏ် ချခံရသူတွေထဲက ၁၆ ဦးကို နိုင်ငံဝန်ထမ်းအပြင်းအထန်နာကျင်စေမှု ပုဒ်မထပ်ကပ်ပြီး ထောင် ၃ နှစ်စီထပ်ချခဲ့သေးတယ်နိုင်ငံရေးအကျဉ်းသားများကွန်ရက်ထံကသိရပါတယ်။
ပုဒ်မ ၂ ခုနဲ့ ထောင်ဒဏ် ၆ နှစ်စီထပ်တိုးချခံရသူ နိုင်ကျဉ်း ၁၆ ဦးကို ပုသိမ်ထောင် သီးသန့်တိုက်ထဲမှာ ထားထားတယ်လို့သိရပါတယ်။
အခုနှစ် ဇန်နဝါရီလပထမပတ်အတွင်းပုသိမ်ထောင်မှာ နိုင်ကျဉ်းအချို့ရိုက်နှက်ခံရတာကို အခြားသောနိုင်ငံရေးအကျဉ်းသားတွေက ကန့်ကွက်ရာကနေ ထောင်အာဏာပိုင်တွေနဲ့ပဋိပက္ခဖြစ်ခဲ့တာပါ။
ဒါကို ထောင်အာဏာပိုင်တွေက ပစ်ခတ် ရိုက်နှက်ဖြိုခွင်းရာမှာ နိုင်ကျဉ်း ၁ဦးသေဆုံးပြီး ၇၀ နီးပါးထိခိုက်ဒဏ်ရာရခဲ့ပါတယ်။
