ကျပ်သိန်း ၆၀၀၀ခန့်တန်ကြေးရှိ ရွှေထည်ပစ္စည်းများပါသွားဟုဆို
ကချင်ပြည်နယ် ဖားကန့်မြို့တွင် စစ်ရေးတင်းမာနေ၍ စစ်ကောင်စီတပ်ဖွဲ့ဝင်အများအပြား တပ်စွဲထားချိန် မြို့ပေါ်ရှိ ရွှေဆိုင်တစ်ဆိုင် ဓားပြတိုက်ခံတိုက်ရပြီး ကျပ်သိန်း ၆၀၀၀ခန့်တန်ကြေးရှိ ရွှေထည်ပစ္စည်းများပါသွားကြောင်း သတင်းရရှိသည်။
ဖားကန့်မြို့နယ်၊ လုံးခင်းကျေးရွာ၊ ရပ်ကွက်(၂)ရှိ မိုးရတနာရွှေဆိုင်သည် ယနေ့ (အောက်တိုဘာ ၅ရက်) နေ့လယ် ၂နာရီခန့်တွင် ဓားပြတိုက်ခံရခြင်းဖြစ်သည်။
” လူလေးယောက်က ဆိုင်ကယ်နဲ့ လာတာ။ ပေါ်တင်ပဲ။ အေးဆေးပဲ။မျက်နှာတော့ မျက်နှာဖုံး တပ်ထားတယ်။ ဆိုင်ရှင်နဲ့ ဝန်ထမ်းတွေကို ကြိုးတုပ်ပြီး ရွှေတွေကိုယူသွားတာ”ဟု အဆိုပါရွှေဆိုင်အနီးနေသူတစ်ဉီးက ပြောသည်။
ဓားပြတိုက်ခံရမှုတွင် ရွှေထည်စုစုပေါင်း အလေးချိန် ၁ပိဿာခန့်ပါသွားပြီး စုစုပေါင်း ဆုံးရှုံးမှုသည် ကျပ်သိန်း ၆၀၀၀ခန့် ရှိကြောင်း ရွှေဆိုင်နှင့်နီးစပ်သူများက ဆိုသည်။
ဖားကန့်မြို့တွင် အောက်တိုဘာ ၃ရက်က ကချင်လွတ်မြောက်ရေးတပ်မတော်(KIA)၊PDF ပူးပေါင်းတပ်ဖွဲ့နှင့် စစ်ကောင်စီတပ်တို့ တိုက်ပွဲအပြင်းအထန်ဖြစ်ခဲ့ပြီးနောက် စစ်ကောင်စီတပ်ဖွဲ့ဝင်အများအပြားမှာ မြို့ပေါ်၌ တပ်စွဲထားသည်။ ထိုအခြေအနေတွင် ရွှေဆိုင်ဓားပြတိုက်ခံရမှုကြောင့် စစ်ကောင်စီတပ်ဖွဲ့ဝင်များနှင့် ပက်သက်မှုရှိနိုင်ကြောင်း ဒေသခံများက သုံးသပ်သည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
“ယူနီဖောင်းတွေနဲ့ရော အရပ်ဝတ်နဲ့ပါ လမ်းတွေပေါ်တွေ့နေရတယ်။ ဒီကြားထဲကနေ ဓားပြတိုက်ခံရတာ”ဟု ဖားကန့်မြို့ခံတစ်ဦးက ပြောသည်။
အောက်တိုဘာ ၃ရက်တိုက်ပွဲတွင် စစ်ကောင်စီတပ်ဖွဲ့ဝင်အချို့ သေဆုံးပြီး စစ်ကောင်စီတပ်ထံမှ သေနတ်နှစ်လက်၊ ကားတစ်စီးကို KIA၊PDF ပူးပေါင်းတပ်ဖွဲ့က သိမ်းယူနိုင်ခဲ့ကြောင်း သတင်းရရှိသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)