စစ်ကိုင်းတိုင်း၊ ရွှေဘိုမြို့နယ်တွင် ကျေးရွာပြည်သူများအား ကင်းမစောင့်လျှင် ကျပ်ငါးသောင်းတောင်းခံနေသည့် သီလုံးကျေးရွာမှ ပျူစောထီးများအား ဖုန်းဆက်သတိပေးပြီးနောက် သွားရောက်တိုက်ခိုက်ခဲ့ကြောင်း ဒေသတွင်းတော်လှန်ရေးအင်အားစုများက ပြောသည်။
ယမန်နေ့(အောက်တိုဘာ ၄ ရက်) ည ၉ နာရီခွဲခန့်က ရွှေဘိုမြို့နယ်၊ သီလုံးကျေးရွာရှိ ပျူစောထီးစခန်းအား လက်နက်ငယ်များ၊ လက်လုပ်(၆၀) မမ လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း Shwebo Federal Army- SBFAအဖွဲ့၏ ပြန်ကြားရေးတာဝန်ခံက ပြောသည်။
အဆိုပါ သီလုံးကျေးရွာနေ ပျူစောထီး ခေါင်းဆောင်ဇော်ဦးဆိုသူသည် ကျေးရွာနေ ပြည်သူများအား ဖိအားပေး ကင်းစောင့်ခိုင်းခြင်း၊ ကင်းမစောင့်နိုင်လျှင် ကျပ်ငါးသောင်း ပေးဆောင်ရမည်ဟု ခြိမ်းခြောက်ခြင်း၊ ပြည်သူများ၏ ပစ္စည်းများအား အဓမ္မသိမ်းဆည်းခြင်း၊ တိမ်းရှောင်နေရသည့်ပြည်သူများ၏ လယ်ယာများအား အဓမ္မသိမ်းဆည်းခြင်းများ ပြုလုပ်နေ၍ တိုက်ခိုက်ခဲ့ခြင်းဖြစ်ကြောင်း တော်လှန်ရေးအင်အားစုများက ပြောသည်။
“ပျူနဲ့ရဲ တစ်ရွာလုံး ၃၀ရှိတယ်။ စစ်သားကတော့ ပျူတွေထိန်းဖို့ ခုနစ်ယောက်လောက်ပဲရှိမယ်”ဟု SBFAအဖွဲ့၏ ပြန်ကြားရေးတာဝန်ခံက ပြောသည်။
သွားရောက်တိုက်ခိုက်ခြင်းမပြုမီ ပျူခေါင်းဆောင်ဇော်ဦးထံ ဖုန်းဆက်ပြီး သတိပေးခဲ့သည်ဟု မဟူရာရွှေဘိုသားအဖွဲ့က ဆိုသည်။
Public Service Announcement
အဆိုပါ တိုက်ခိုက်မှုကို ဗိုလ်မိကျောင်း ပြည်သူလုံခြုံရေး အဖွဲ့ Shwebo Federal Army SBFA ၊ဒေါင်းမာန် ၊ ရွှေဘိုစွန်ရဲ ၊ မဟူရာ ရွှေဘိုသား ၊EYE Fore EYE ၊ HG Fighter ၊ဗိုလ်မဟာ ၊ ဒေါင်းစစ်သည်၊ AhPal -7 ၊ MDF shwebo ၊ရွှေဘိုအားမာန်၊ မဟာမိတ်ဖြစ်သော ဗိုလ်လင်းရောင် (ဒပယ)တို့ ပူးပေါင်းတိုက်ခိုက်ခဲ့ခြင်း ဖြစ်သည်။
Shwebo Federal Army SBFA အဖွဲ့က စခန်းသိမ်းနိုင်သည်အထိ တိုက်ခိုက်နိုင်ရန် လက်နက်ခဲယမ်းလိုအပ်နေ၍ ပြည်သူများထောက်ပံ့ကူညီနိုင်ကြောင်း အသိပေးထားသည်။
