ရှမ်းပြည်မြောက်ပိုင်းမှာဖြစ်ပွားနေတဲ့ တိုက်ပွဲတွေကြောင့် စစ်ရှောင်ရသူ ပြည်သူ ဦးရေ ၂ သောင်းကျော် ရှိလာပြီလို့ သျှမ်းကျောင်းသားသမဂ္ဂထံကသိရပါတယ်။
လားရှိုး ၊ သိန္နီ၊ကွတ်ခိုင် ၊နမ့်ခမ်း ၊ကျောက်မဲ ၊နောင်ချို စတဲ့ မြို့တွေက ဒေသခံ ပြည်သူ တွေ ဘေးကင်းရာကို ထွက်ပြေးတိမ်းရှောင်နေရတာပါ။
” တောတောင်ထဲမှာ၊ကျေးရွာတွေထဲမှာ ပုန်းနေရပြီးပိတ်မိနေတဲ့ပြည်သူတွေလဲ သောင်းချီရှိနေပါတယ်” လို့ သျှမ်းကျောင်းသားသမဂ္ဂက တာဝန်ရှိသူက ဆိုပါတယ်။
လက်ရှိမှာ သန္နီ၊ လားရှိုး ၊ ကျောက်မဲ၊ နမ့်ခမ်းမြို့တွေမှာစစ်ရှောင်စခန်းတွေဖွင့်လှစ်ထားပြီး လူဦးရေများပြားနေမှုကြောင့် စစ်ရှောင်လက်ခံနိုင်ဖို့ နေရာအသစ်တွေထပ်မံလိုအပ်နေတယ်လို့သိရပါတယ်။
လားရှိုးရှိ စစ်ရှောင်စခန်း၈ခုမှာ လူဦးရေ ၄,၀၀၀နီးပါး ရှိပြီး နီးစပ်ရာတောတွေထဲမှာတိမ်းရှောင်နေသူတွေလည်းရှိနေပါတယ်။
Public Service Announcement
ကျောက်မဲမြို့နယ် နောင်ပိန်ကျေးရွာဘုန်းကြီးကျောင်းမှာ စစ်ရှောင် ၃၀၀ကျော်ရှိပြီး ပိတ်မိနေသူတွေလည်းရှိနေပါတယ်။
နမ့်ခန်းမြို့မှာလည်း တိုက်ပွဲတွေရှိနေပြီး အင်တာနက်လိုင်းနဲ့ ဖုန်းလိုင်းဖြတ်တောက်ထားလို့ အရပ်သားထိခိုက်မှုနဲ့ စစ်ရှောင်တွေရဲ့ သတင်း အတိအကျ သိရဖို့ ခက်ခဲနေပါတယ်။
ရန်ကုန်မြို့မှာရှိတဲ့ ကုလသမဂ္ဂလူသားချင်းစာနာမှုဆိုင်ရာညှိနှိုင်းရေးရုံး(UNOCHA) ကရှမ်းမြောက် တိုက်ပွဲတွေကြောင့် ရာနဲ့ချီတဲ့ ပြည်သူတွေဟာ တရုတ်နိုင်ငံဘက်ကို တိမ်းရှောင်ဖို့ နယ်စပ်ဖြတ်ကျော်တာတွေရှိနေတယ်လို့ ထုတ်ပြန်ထားပါတယ်။
ကုလရဲ့စာရင်းအရတော့ ညီနောင်သုံးဖွဲ့ရဲ့ စစ်ဆင်ရေးစပြီး ၄ ရက်အကြာ အောက်တိုဘာလ ၃၀ ရက်အထိ ရှမ်းမြောက်မှာ လူဦးရေ ၆,၀၀၀ကျော်နေရပ်စွန့်ခွာရတယ်လို့ သိရပါတယ်။
ဓာတ်ပုံ − Tai Students’ Union
