တနင်္သာရီတိုင်း လောင်းလုံးမြို့မရဲစခန်းနှင့် စစ်ဘက်ရေးရာလုံခြုံရေးတပ်ဖွဲ့(စရဖ)ရုံးကို ပြည်သူ့ကာကွယ်ရေးမဟာမိတ် တပ်ဖွဲ့များက ယနေ့ နံနက်အစောပိုင်းတွင် ပစ်ခတ်တိုက်ခိုက်ခဲ့ရာ ထိခိုက်မှုရှိကြောင်း သတင်းရရှိသည်။
ရဲစခန်းနှင့် စရဖရုံးကို ယနေ့ နံနက် ၅နာရီခန့်တွင် စတင်တိုက်ခိုက်ခြင်းဟု သိရသည်။
“ပစ်ခတ်သံတွေက တော်တော်လေး ကြမ်းတယ်။ ၅နာရီခွဲကာနီး ရပ်သွားတယ်။ ရဲစခန်းထဲကို ဆေးရုံကားတွေ ဝင်သွားတယ်။ အခုထိ ငြိမ်နေတယ်”ဟု ဒေသခံတစ်ဦးက ယနေ့ နံနက် ၁၀နာရီခွဲခန့်တွင် ပြောသည်။
စစ်ကောင်စီဘက်မှ ထိခိုက်မှုကို မသိရသေးပေ။ တိုက်ခိုက်မှုဖြစ်စဉ်ဖြစ်ပွားခဲ့ကြောင်းတနင်္သာရီတိုင်း ပြည်သူ့ကာကွယ်ရေးအဖွဲ့ တာဝန်ရှိသူတစ်ဦးကပြောပြီး အသေးစိတ်မသိရသေးဟု ဆိုသည်။
တနင်္သာရီတိုင်းတွင် ဒီဇင်ဘာ ၃ရက်ကလည်း စစ်ကောင်စီတပ် ဆုတ်ခွာသွားသည့် ထားဝယ်မြို့အနီးရှိ တည်ဆောက်ဆဲ အကျဉ်းထောင်သစ် ဆောက်လုပ်ရေး လုပ်ငန်းခွင်ကို ပြည်သူ့ကာကွယ်ရေးတပ်ဖွဲ့များက ဝင်ရောက်မီးရှို့ရှင်းလင်းခဲ့သေးသည်။
Public Service Announcement
