မကွေးတိုင်း၊ ဆိပ်ဖြူမြို့နယ်ရှိ ကန်စွန်းမနယ်မြေရဲစခန်းကို ဒေသခံကာကွယ်ရေးတပ်များက ဒီဇင်ဘာ ၄ ရက်တွင် ဝင်ရောက်တိုက်ခိုက်ခဲ့ကြောင်း ဒေသခံများက ပြောသည်။
ဒီဇင်ဘာ ၄ ရက် နံနက်၆နာရီခန့်က စတင်တိုက်ခိုက်ခဲ့ပြီး ၁နာရီခွဲခန့် တိုက်ပွဲကြာမြင့်ခဲ့သည်ဟု ဒေသခံများက ပြောသည်။
တိုက်ခိုက်မှုကြောင့် စစ်ကောင်စီတပ်သားများ ကျဆုံးမှုများနှင့် လက်နက်ခဲယမ်းရရှိမှုများလည်းရှိသည်ဟု ဒေသခံများက ဆိုသည်။
“ရဲစခန်းအထိ PDFတွေဝင်နိုင်ပြီး စခန်းထဲက အဆောက်အဦးတချို့ကို မီးရှို့နေချိန်မှာ စစ်ကူတွေထပ်ရောက်လာလို့ ပြန်ဆုတ်လာခဲ့ရတယ်”ဟု ကာကွယ်ရေးတပ်ဖွဲ့ဝင် ရဲဘော်တစ်ဦးက ပြောသည်။
တိုက်ပွဲအသေးစိတ်ကို ကာကွယ်ရေးဝန်ကြီးဌာနက ထုတ်ပြန်မည်ဖြစ်ကြောင်းလည်း ၎င်းကဆိုသည်။
Public Service Announcement
တိုက်ခိုက်မှုကြောင့် မုံရွာ-ပုသိမ်လမ်းပိုင်းနှင့် ဆော-ဆိပ်ဖြူလမ်းပိုင်းလည်း ယာယီပိတ်ထားရသည်ဟု ဒေသခံများက ပြောသည်။
ကန်စွန်းမကျေးရွာသည် စစ်ကောင်စီတပ်ကာကွယ်ရေးပစ္စည်းထုတ်စက်ရုံနှစ်ခုကြားတွင်ရှိပြီး စစ်ကူများအလွယ်တကူလာရောက်နိုင်ခဲ့သည်ဟု ဒေသခံများက ပြောသည်။
မကွေးတိုင်း ဆော-ဆိပ်ဖြူလမ်းမပေါ်ရှိ အဆိုပါရဲစခန်းကို မင်းဘူးခရိုင်တပ်ရင်း(၇)နှင့် အခြားဒေသခံကာကွယ်ရေးတပ်ဖွဲ့များက တိုက်ခိုက်ခဲ့ခြင်းဖြစ်သည်။
