ဖားကန့်တွင် ကျောက်စိမ်းမဟုတ်သည့် သက်ရှိအဖိုးတန်ရတနာ ထွက်ရှိလာပြီဟု ဒေသခံများက ဂုဏ်ယူဝင်ကြွားစွာပြောသည်။
” ဒီနေ့ ကျတော်တို့ ဖားကန့်မှာ သူ့အကြောင်းပဲ ပြောနေကြတာ”ဖားကန့်ဒေသခံတဦးက ဆိုလေသည်။
သူတို့ပြောနေကြသူက ဖားကန့် KPDF တပ်ဖွဲ့ဝင် မချောစု(ခ)ဂျန်မော်ခေါန်ရှောင် အကြောင်းဖြစ်သည်။KPDF ဆိုသည်မှာ ကချင်ပြည်နယ်မှ KIA လက်အောက်ရှိ ပြည်သူ့ကာကွယ်ရေးတပ်ဖွဲ့-PDF ဖြစ်ပါသည်။
မချောစု(ခ)ဂျန်မော်ခေါန်ရှောင်သည် အသက် ၄၇ နှစ်အရွယ်ဖြစ်ပြီး ကလေး ငါးဦးမိခင်ဖြစ်သည်။ မူလက စက်ချုပ် လုပ်ငန်းလုပ်ဖြင့် အသက်မွေးသော်လည်းစစ်တပ်က နိုင်ငံတော် အာဏာသိမ်းသည့်အခါ PDF ထဲသို့ ဝင်ပြီး စစ်အာဏာရှင်ကို တော်လှန်တိုက်ခိုက်နေသူဖြစ်ကြောင်း KPDF က ဆိုသည်။
ကချင်လွတ်လပ်ရေးတပ်မတော် KIAနှင့်KPDF ပူးပေါင်းတပ်ဖွဲ့သည် ဝှေခါ ဗျူဟာစစ်တပ်စခန်းကုန်းကို ဇန်နဝါရီလ ၁၈ရက်နံနက် ၄နာရီတွင် စတင်တိုက်ခိုက်ခဲ့ပြီး ဇန်နဝါရီလ ၂၀ရက် နံနက်တွင် အပြီးသတ်သိမ်းပိုက်နိုင်ခဲ့သည်။ ဝှေခါဗျူဟာ မသိမ်းနိုင်ခင် ဝှေခါ ရဲစခန်းကို ဇန်နဝါရီ လဆန်းကတည်းက ကနဦးသိမ်းပိုက်ခဲ့ခြင်းသည်။
Public Service Announcement
စစ်ကောင်စီက လေကြောင်းမှ အကြိမ်ကြိမ်တိုက်ခိုက်ခဲ့သည့် သုံးရက်ဆက်တိုက်ပွဲအတွင်း KPDF တပ်သားအဆင့် မချောစုသည် ကျန် KIA၊ KPDF ရဲဘော်များနှင့်အတူ ရင်ဘောင်တန်း၍ တိုက်ပွဲဝင်ခဲ့သည်ဟု KPDF ရဲဘော်တစ်ဦးကပြောသည်။ တိုက်ပွဲအပြီးတွင် မချောစုအား KIAက တပ်ကြပ်ကြီးအဖြစ်ရာထူးတိုးပေးလိုက်ပြီး ရွှေဆွဲကြိုးတစ်ကုံးလည်း ချီးမြှင့်လိုက်သည်။
” မချောစုကိုKIAက ရာထူးတိုးပေးလိုက်ပြီ။သူက ဝှေခါခစန်းသိမ်းတိုက်ပွဲမှာအစအဆုံး ဝင်တိုက်ခဲ့တာ”ဟု KPDF ရဲဘော်ကပြောသည်။
ဝှေခါရွာ စခန်းသိမ်းတိုက်ပွဲတွင် ရဲရင့်စွာဖြင့် အမျိုးသားရဲဘော်များနှင့်အတူရင်ဘောင်တန်းပြီး တိုက်ပွဲစတင်ချိန်မှ ပြီးဆုံးသည်အထိ ပါဝင်တိုက်ခိုက်ခဲ့သောကြောင့် တပ်သားအဆင့်မှ တပ်ကြပ်ကြီး အဆင့်သို့ KIA ကချီးမြင့်ခဲ့ခြင်းဖြစ်ကြောင်း KIA ၏သတင်းပြန်ကြားရေးဌာနတစ်ခုဖြစ်သော Kachin Net က ကချင်ဘာသာဖြင့်ဖော်ပြသည်။
ဖားကန့်မှ PDF ထောက်ပို့ ရဲဘော်တဦးက”သူ(မချောစု)က သိပ်တော်တာ။ သိပ်သတ္တိရှိတာ။ ဝှေခါစခန်းကို သိမ်းတော့ သူက ကျုပ်တို့ရဲဘော်တွေနဲ့ တသားတည်းဗျ” ဟုချီးကျူးပြောကြား သည်။
စစ်အာဏာရှင်တော်လှန်ရေး၌ KIA တွင်ရော KPDF တွင်ပါ အမျိုးသမီးစစ်သည်များ ပါဝင်တိုက်ခိုက်နေသည်ဟု ၎င်းက ဆက်ပြောသည်။
စစ်တပ်ကအာဏာသိမ်းပြီးလိုက်သဖြင့် အာဏာရှင်စနစ်ကို မလိုလားသောကြောင့် သားသမီးများ၏ရှေ့ရေးအတွက်၊ တိုက်ပြည်အတွက် ပြည်သူ့ကာကွယ်ရေးတပ်မတော်သားအဖြစ် ပါဝင်တာဝန်ထမ်းဆောင်နေခြင်းဖြစ်သည်ဟု စက်ချုပ်သူ အဖြစ်မှ PDF ဖြစ်လာသောမချောစု(ခ)ဂျန်မော်ခေါန်ရှောင်ကပြောကြားထားသည်။
