▪︎စစ်အာဏာရှင် ချုပ်ငြိမ်းရေးနေ့ည တိုက်ပွဲဝင်နေခြင်းဖြစ်ပြီး ဒွိဟသံသယ မဖြစ်ရန် နှင့် စိတ်ဓာတ်မကျရန် KNLA မြေပြင် တပ်မှူးပြော
ဟန်နွေ/People’s Spring
ကရင်အမျိုးသားအစည်းအရုံး(KNU) ဖာပွန်ခရိုင် ဖာပွန်ဒေသ အခြေစိုက် စစ်ကောင်စီတပ်ရင်း(၂)ကို ယမန်နေ့ ဧပြီ ၂၄ရက်က သိမ်းပိုက်နိုင်ခဲ့ကြောင်း KNU တပ်မဟာ(၅)က ယနေ့ညပိုင်း၌ ထုတ်ပြန်သည်။
ယမန်နေ့ (ဧပြီ ၂၄ )မနက် ၄နာရီတွင် ကရင်အမျိုးသားလွတ်မြောက်ရေးတပ်မတော်(KNLA)နှင့် မဟာမိတ် ပူးပေါင်းတပ်ဖွဲ့များက ခမရ(၄၃၄) နှင့် စစ်ဝတ်တန်ဆာစုဆောင်းရေးဌာန-စစန(၆၄၂) တပ်စခန်းအား တစ်ရက်အတွင်း အပြီး သိမ်းပိုက်နိုင်ခဲ့ခြင်းဖြစ်သည်ဟု အသိပေးထားသည်။
စခန်းသိမ်းတိုက်ပွဲအပြီးစစ်ကောင်စီ၏လက်နက်ခဲယမ်းအမြောက်အများအားသိမ်းဆည်းရရှိခဲ့ကြောင်း မှတ်တမ်းဓာတ်ပုံများနှင့်အတူ ဖော်ပြထားပြီး အရေအတွက်ကို မကြာမီ အလျဉ်းသင့်ပါက အသိပေးမည်ဟု ထုတ်ပြန်သည်။
Public Service Announcement
ရှေ့တန်းစစ်မျက်နှာအတွင်းရှိ ဗိုလ်အယ်ခူစိုး က “လုပ်ငန်းရဲ့လုံခြုံရေးအရ၊ ရှေ့ဆက်လုပ်ဆောင်သွားမည့်လုပ်ငန်းများအပေါ် လုပ်ငန်းဖြစ်မြောက်ခဲ့သမျှကိုကောက်ကာငင်ကာထပြီးမဖေါ်ပြချင်သေးဘူး။ သို့ပေသိ လတ်တလောဖြစ်ပေါ်နေတဲ့ ပြည်သူတွေစိတ်ကုန်လက်ပန်းကျစရာအကြောင်းအရာတွေတွေ့နေရတော့ မဖေါ်ပြမဖြစ်ဖေါ်ပြပေးရခြင်းဖြစ်တယ်။”ဟု ပြောကြားခဲ့ကြောင်း တပ်မဟာ(၅)က ထုတ်ပြန်သည်။
လက်ရှိ KNU ဦးဆောင်သည့် ပူးပေါင်းတပ်ဖွဲ့များ တိုက်ပွဲဝင်နေမှုအပေါ် ဒွိဟ မဖြစ်ကြရန်လည်း ဗိုလ်အယ်ခူစိုးက ပြောကြားသည်။
“အခု ကျွန်တော်တို့တစ်တွေသွားနေတာက စစ်အာဏာရှင်အမြစ်ပြတ်ချုပ်ငြိမ်းရေးနဲ့ ကိုယ့်ကံကြမ္မာကိုယ်ဖန်တီးနိုင်ဖို့ နေ့နေ့ညညတိုက်ပွဲဝင်နေပါတယ်ဆိုတာကို ပြည်တွင်း၊ နယ်စပ်၊ ပြည်ပမှာရှိနေကြတဲ့ ကရင်ပြည်သူတွေရော တိုင်းရင်းသားပြည်သူတွေအားလုံးကိုပြောချင်ပါတယ်။ ရှိရှိသမျှငွေအင်အား၊ လူအင်အား၊ စိတ်ဓာတ်အင်အား အားလုံးပါဝင်ပေးဆပ်ကြသူတွေကိုပြောချင်တာက ဒွိဟသံသယမဖြစ်ကြပါနဲ့ စိတ်ဓာတ်ကျဆုံးမှုတစ်စုံတစ်ရာမဖြစ်ကြပါနဲ့” ဟု ဗိုလ်အယ်ခူစိုးက ပြောကြားခဲ့သည်။
စစ်ကောင်စီစခန်းနှစ်ခုမကျဆုံးမီနှင့် ကျဆုံးသွားပြီးနောက်ပိုင်း မူတြော်(ဖာပွန်)ခရိုင်အတွင်းရှိ မြို့နယ်(၃)မြို့နယ်လုံးအတွင်း တိုက်လေယာဥ်ဖြင့်တိုက်ခိုက်ခြင်း၊ ဒရုန်းလေယာဥ်ဖြင့်တိုက်ခိုက်ခြင်းအား ယခင်ကထက်ပိုမိုတိုက်ခိုက်လာကြောင်း၊ သို့ရာတွင် ပြည်သူ ထိခိုက်မှု မရှိကြောင်း အသိပေးသည်။
KNLA ပူးပေါင်းတပ်များသည် မတ်လကတည်းက ဖာပွန်ရှိ စစ်ကောင်စီတပ်များကို ပိတ်ဆို့ တိုက်ခိုက်လျက်ရှိရာ မြို့ပေါ်ရှိ စစ်ကောင်စီတပ်စခန်းအားလုံး ရှင်းလင်းပြီး မြို့ကို ထိန်းချုပ်ထားပြီးဖြစ်သည်။ ထို့ပြင် ခလရ(၁၉) စစ်ကောင်စီတပ်ရင်းကိုလည်း သိမ်းပိုက်ထားနိုင်ပြီးယခု တွင် ထပ်မံ၍ တပ်ရင်းနှစ်ခု သိမ်းပိုက်နိုင်ခြင်းလည်းဖြစ်သည်။
(ဧပြီ ၂၄ ရက်တွင် စစ်ကောင်စီတပ်၏ ဖားပွန်ဒေသခမရ(၄၃၄) နှင့် စစ်ဝတ်တန်ဆာစုဆောင်းရေးဌာန-စစန(၆၄၂) တပ်စခန်းဆို့အားတိုက်ခိုက်သိမ်းပိုက်ပြီး သိမ်းဆည်းရရှိသောလက်နက်ခဲယမ်းများ။ ဓါတ်ပုံ-KNU Mutraw News)
