ဟာနာဆန်/People’s Spring
မကွေးတိုင်း၊ ပခုက္ကူနှင့် မြိုင်မြို့ပေါ်ရှိ စစ်ကောင်စီဂိတ်များ နှစ်ရက်ဆက် တိုက်ခိုက်ခံရကြောင်း သတင်းရရှိသည်။
မေလ ၁၇ ရက် ညနေ၅ နာရီခန့်က မြိုင်မြို့ပေါ်ရှိ စစ်သား၊ ရဲနှင့်ပျူစောထီး ၁၀ ဦးခန့်ရှိသော ဒေသအခေါ် အောင်ဇော်မိုးဂိတ်အား မြိုင် ပကဖနှင့်မဟာမိတ်များက လက်နက်ကြီး၊ လက်နက်ငယ် များဖြင့် တိုက်ခိုက်ခဲ့သည်။
တိုက်ခိုက်မှုကြောင့် စစ်သား သုံးဦးထက်မနည်း သေဆုံးသည်ဟု မြိုင်ပကဖက ဆိုသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
သေဆုံးစစ်သားများထံမှ လက်နက် သွားကောက် သည့် ရဲဘော်တစ်ဦး မစိုးရိမ်ရဒဏ်ရာရရှိခဲ့ကြောင်း သိရသည်။
![(မြိုင်မြို့ပေါ်နှင့် ပခုက္ကူမြို့နယ်ရှိ စစ်ကောင်စီဂိတ်များအား PDFများ တိုက်ခိုက်နေစဥ်။ ဓာတ်ပုံ - File Video)](https://i0.wp.com/www.ludunwayoo.com/wp-content/uploads/2024/05/443821237_782748743923920_589719974726433777_n.jpg?resize=720%2C405&ssl=1)
ထို့အပြင် မြိုင်မြို့ မီးသတ်ရုံး၌ တပ်စွဲထားသော စစ်အုပ်စုကိုလည်း ထပ်မံတိုက်ခိုက်ခဲ့ရာ အထိအခိုက်များရှိကြောင်း မြိုင်ပကဖက ပြောသည်။
“အောင်ဇော်မိုးဂိတ်က မြိုင်မြို့ပေါ် ကုန်းပေါ်မှာရှိတာ။ ပြည်သူ့အိမ်မှာတပ်စွဲထားတာ။ မျက်မြင် သုံးဦးသေတယ်။ မီးသတ်ရုံးနဲ့နှစ်နေရာတပြိုင်တည်း တိုက်တာပါ။ နှစ်နေရာကမီတာ၃၅၀ လောက်ကွာတယ်။ တစ်နာရီအေးအေးလောက်ကြာတယ်။ သူတို့နဲ့တော်တော်နီးနီးထိကပ်နိုင်ခဲ့တယ်”ဟု မြိုင်ပကဖ တာဝန်ရှိသူက ပြောသည်။
အလားတူ မေလ ၁၆ ရက် ညနေ ၃ နာရီမှ ၅ နာရီအထိ ပခုက္ကူမြို့နယ်၊ တင်းဂါတ်ရွာအနီး ပခုက္ကူ-ပေါက်လမ်းမပေါ်ရှိ စစ်ကောင်စီ စစ်ဆေးရေးဂိတ်အား အီနာဂါဗုံးသီး အလုံး ၂၀ချ တိုက်ခိုက်ခဲ့ကြောင်း မြိုင်ပကဖက ပြောသည်။
![(မြိုင်မြို့ပေါ်နှင့် ပခုက္ကူမြို့နယ်ရှိ စစ်ကောင်စီဂိတ်များအား PDFများ တိုက်ခိုက်နေစဥ်။ ဓာတ်ပုံ - File Video)](https://i0.wp.com/www.ludunwayoo.com/wp-content/uploads/2024/05/443698604_782748800590581_3885134221203113332_n.jpg?resize=719%2C405&ssl=1)
တိုက်ခိုက်မှုကြောင့် တင်းဂါတ်ပျူစောထီးကျေးရွာမှ ပျူ ဒုလက်ထောက်သန့်ဇင် အပါအဝင် စစ်သားနှင့်ပျူစောထီး ရှစ်ဦး ထိခိုက်ဒဏ်ရာရရှိခဲ့ကြောင်း မြိုင်ပကဖက ဆိုသည်။
“အဲဒီဂိတ်က ခရီးသွားပြည်သူတွေနဲ့ ကားသမားတွေကို ငွေကြေးအတောင်းကြမ်းပြီး အနိုင်ကျင့်ဗိုလ်ကျတဲ့ဂိတ်ပါ။ ပျူ ဒုလက်ထောက် သန့်ဇင် ဆိုတာကလည်း အလုပ်လက်မဲ့သူခိုးဂျပိုးတွေကို ပျူစောထီးအဖွဲ့ထဲဝင်ဖို့ စုဆောင်းနေတဲ့သူ။”ဟု မြိုင်ပကဖ တာဝန်ရှိသူက ပြောသည်။
သို့သော် စစ်ကောင်စီတပ်၏ ထိခိုက်သေဆုံးမှုများအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
မြိုင်မြို့ပေါ် စစ်ဆင်ရေးကို မြိုင် ပကဖ တပ်ရင်း(၁ )၊ တပ်ရင်း(၁) တပ်ခွဲ(၃) ၊ဗိုလ်မိုက်ခဲပြည့်သူကာကွယ်ရေးတပ်ဖွဲ့၊GOEပြောက်ကြားတပ်ဖွဲ့၊လရောင်ပြည်သူ့ကာကွယ်ရေးတပ်ဖွဲ့နှင့်ဗိုလ်ထိရှပြည်သူ့ကာကွယ်တပ်ဖွဲ့တို့ကလည်းကောင်း၊ တင်းဂတ်ရွာဂိတ်စစ်ဆင်ရေးကို မြိုင်ပကဖ၊ Black Cobra၊ Pku Thurian၊ KMDF(Kamma Defence Force)တို့ကလည်းကောင်း ပူးပေါင်းတိုက်ခိုက်ခဲ့ခြင်းဖြစ်သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)