ကျော်ဇော/People’s Spring
ပဲခူးတိုင်း၊ ပေါင်းတည်မြို့နယ်၊ တောင်ပေါ်ကြို့ကုန်းအုပ်စုမှတဆင့် ပဲခူးရိုးမပေါ်သို့ စစ်ကြောင်းထိုးလာသော စစ်ကောင်စီတပ်ကို လက်ဦးမှုရယူတိုက်ခိုက်နိုင်ခဲ့ကြောင်း ပြည်ခရိုင် PDF တပ်ရင်း ၃၆၀၁(PPDF)မှ ဆက်သွယ်ရေးနှင့် ပြန်ကြားရေးတာဝန်ခံက ပြော သည်။
ဇွန် ၁ရက် နေ့လယ် ၁ နာရီခွဲခန့်က အင်အား ၄၀ ခန့်ပါ စစ်ကောင်စီတပ်စစ်ကြောင်းသည် တောင်ပေါ်ကြို့ကုန်းအုပ်စု၊ မကျီးစမ်းရွာမှ သိမ်ကုန်းကျေးရွာဘက်သို့ စစ်ကြောင်းထိုးလာစဥ် တပ်ရင်း ၃၆၀၁(PPDF)၊ တပ်ခွဲ (၂)မှ ပြင်ကြီးရွာနှင့် ကျောက်ကြီးတောင်ကြား၌ လက်နက်ကြီး၊ လက်နက်ငယ်များဖြင့်ကြားဖြတ်တိုက်ခိုက်ခဲ့သည်။
ထိုနောက် ၎င်းစစ်ကြောင်းမှ ထွက်ခွာလာသော စစ်ကောင်စီတပ်သားအချို့ကို ပြည်ခရိုင် တပ်ရင်း ၃၆၀၂၊ တပ်ခွဲ(၄)မှရဲဘော်များက ရန်သူ့တပ်များ မိုင်းကွင်းထဲအရောက်တွင်ပဒေသာမိုင်းကြီး သုံးလုံးဖြင့် ဖောက်ခွဲတိုက်ခိုက်ခဲ့ကြောင်း ပြည်ခရိုင်တပ်ရင်းများ၏ ပြန်ကြားရေးတာဝန်ခံက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
အလားတူ ဇွန် ၁ရက် ည ၈ နာရီ ၄၅မိနစ်ခန့်တွင်လည်း အထက်ပါ စစ်ကောင်စီတပ်စစ် ကြောင်းမှ တပ်သားများ ဓာတ်မီးကိုယ်စီဖြင့် ထွက်လာစဥ် တော်လှန်ရေးတပ်ဖွဲ့များက ဒုတိယအကြိမ် မိုင်းဆွဲတိုက်ခိုက်ခဲ့သည်ဟု ၎င်းပြန်ကြားရေးတာဝန်ခံက ဆက်ပြောသည်။
လက်နက်ကြီး၊ လက်နက်ငယ်များဖြင့် ကြားဖြတ် တိုက်ခိုက်ခြင်းနှင့် မိုင်းဆွဲတိုက်ခိုက်ခြင်းများကြောင့် စစ်ကောင်စီတပ်ဘက်မှ အနည်း ဆုံးသုံးဦးသေဆုံးကာ အများအပြား ထိခိုက်ဒဏ်ရာရ၍ နောက်ပြန်ဆုတ်သွားကြောင်း တပ်ရင်း(၃၆၀၁) က အသိပေးသည်။
“အခုလက်ရှိ မကျီးစမ်းဘက်ကို နောက် ကြောင်း ပြန်ဆုတ်သွားတယ်ဗျ။ အဲမှာ ဒဏ် ရာရတဲ့သူတွေကို သယ်သွားတယ် ပုခက်တွေနဲ့ ထမ်းပြီးတော့”ဟု တပ်ရင်း ၃၆၀၁(PPDF)မှ ပြန်ကြားရေးတာဝန်ခံက ပြောသည်။
အထက်ပါ တိုက်ခိုက်မှုများအတွင်း စစ်ကောင်စီတပ်ဘက်မှ ထိခိုက်ကျဆုံးများကာ အထိနာသွားသဖြင့် လက်နက်ငယ်များဖြင့် ရမ်းသမ်း ပြန်လည်ပစ်ခတ်ခဲ့သော်လည်း တော်လှန်ရေးရဲဘော်များဘက်မှ အထိအခိုက်မရှိ ဆုတ်ခွာနိုင်ခဲ့ကြောင်း အသိပေးထားသည်။
ပြီးခဲ့သည့် မေလနောက်ဆုံးပတ်အတွင်းကလည်း ပဲခူးတိုင်း၊ ကျောက်တံခါးမြို့နယ်၊ မြို့ချောင်း-စိန်ကန့်လန့် ပဲခူးရိုးမဖြတ်လမ်းတွင် စစ်ကောင်စီတပ်နှင့် တော်လှန်ရေးတပ်ဖွဲ့များကြား လေးရက်ဆက်တိုက်ပွဲဖြစ်ပွားခဲ့ရာ စစ်ကောင်စီဘက်မှ ၃၅ဦးထက်မနည်းသေဆုံး၍ PDF ရဲဘော်နှစ်ဦး ကျဆုံးခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)