ဒီဇင်ဘာ-၂၆၊၂၀၂၅။ဇော်ဝင်း/People’s Spring
ပဲခူးတိုင်း၊ရေတာရှည်မြို့နယ်တိုက်ပွဲမှာ သေဆုံးခဲ့တဲ့ စစ်ကောင်စီတပ်သား ရုပ်အလောင်းတချို့ စစ်တောင်းမြစ်အတွင်း မျောနေတယ်လို့ ဒေသတွင်းစစ်ရေးသတင်းရင်းမြစ်အချို့က ပြောပါတယ်။
အခု ဒီဇင်ဘာ ၂၃ရက်က ရေတာရှည်မြို့နယ် စစ်တောင်းမြစ်အရှေ့ဘက်နဲ့ အနောက်ဘက်ခြမ်းက စစ်ကောင်စီတပ် အထိုင်စခန်းတွေနဲ့ မဲရုံနေရာတွေကို နေပြည်တော် PDFတပ်ရင်းတွေက တိုက်ခိုက်ရှင်းလင်းခဲ့တာဖြစ်ပါတယ်။
“ မနေ့က မနက်ပိုင်းတွေ့တာဗျ။ဒီကောင်တွေ မမြုပ်ပေးပဲ မြစ်ထဲပစ်ချလိုက်တာ” လို့နေပြည်တော်တိုင်းစစ်ဌာန တာဝန်ရှိသူက စစ်ကောင်စီတပ်သား ရုပ်အလောင်းတွေ့ရှိတာနဲ့ပတ်သက်ပြီး ပြောပါတယ်။
Public Service Announcement
စစ်ကောင်စီတပ်အထိုင်စခန်းချပြီးမဲရုံတည်ဆောက်ထားတဲ့ ဆွာမကြီး ကျေးရွာနဲ့ အဲဒီရွာကိုအကာ အကွယ် ပေးထားတဲ့ ရွာသစ်ကျေးရွာ အထိုင်စခန်းတွေနဲ့ မဲရုံကို ရှင်းလင်းတိုက်ခိုက်မှုမှာ စစ်တပ်က သေဆုံးသူ ၁၀ ဦးရှိတယ်လို့ နေပြည်တော် PDF က ဒီဇင်ဘာ ၂၅ရက်မှာ အသိပေးထားပါတယ်။
“ ဆွာမကြီးက စစ်တောင်းမြစ်ကမ်းဘေးနဖူးတင်ထားတဲ့ရွာပါ။အခုတော့ စခတွေ ပြန်ဝင်နေပြီ။ရွာခံတချို့ ဖမ်းဆီးခံထားရတယ်” လို့ ရေတာရှည်မြို့ခံသတင်းရင်းမြစ်က ပြောပါတယ်။
တိုက်ခိုက်ခံရပြီးနောက် ရေတာရှည်မြို့နယ် စစ်တောင်းမြစ်အရှေ့ဘက်ကမ်းက တစ်ခုတည်းရှိတဲ့ ဆွာမကြီးကျေးရွာမဲရုံကို စစ်တောင်းအနောက်ဘက်ကမ်းရွှေ့ခဲ့တယ်လို့ သိရပါတယ်။
“ မြစ်(စစ်တောင်းမြစ်)အနောက်ကမ်း ငါးကြီးကွေ့ကျေးရွာဘက်ကိုပြောင်းထားတယ်” လို့နေပြည်တော်တိုင်းစစ်ဌာန တာဝန်ရှိသူကပြောပါတယ်။
စစ်ကောင်စီရဲ့ရွေးကောက်ပွဲ တားဆီးနိုင်ဖို့အတွက် ရွေးကောက်ပွဲကျင်းပနိုင်တဲ့နေရာ အားလုံးကို ဖြစ်နိုင်တဲ့နည်းလမ်းတွေအားလုံးနဲ့ ဟန့်တားသွားမယ်လို့ နေပြည်တော် PDFက ဆိုပါတယ်။
ပြည်သူတွေအနေနဲ့လည်း စစ်ကောင်စီရဲ့ ရွေးကောက်ပွဲ မဲမထည့်ပဲ ဆန့်ကျင်တားဆီးပေးကြဖို့ တိုက်တွန်းထားပါတယ်။
