မြောက်ကိုရီးယားကို ကဗျာစပ်ပြီး ဂုဏ်ပြုခဲ့တဲ့ အမျိုးသား တယောက်ကို တောင်ကိုရီးယား တရားရုံးက ထပ်တိုး ထောင်ဒဏ် ၁၄ လ ချမှတ်လိုက်ပါတယ်။
လီယောင်ဆိုဟာ ကိုရီးယား နှစ်နိုင်ငံ ပေါင်းစည်းရေးအတွက် တက်ကြွ လှုံ့ဆော်သူ တဦးဖြစ်ပြီး သူက မြောက်ကိုရီးယားကို တခမ်းတနား ဂုဏ်ပြု ရေးဖွဲ့ထားတဲ့ ကဗျာကို ၂၀၁၆ ခုနှစ်မှာ မြောက်ကိုရီးယား အစိုးရ မီဒီယာက ဝါဒဖြန့် ဖော်ပြခဲ့ဖူးပါတယ်။
အဲဒီ ကဗျာထဲမှာ လီက ကိုရီးယား နှစ်နိုင်ငံ ပေါင်းစည်းသွားပြီး ပြုံယမ်းမြို့တော်ရဲ့ ဦးဆောင်မှုနဲ့အတူ အောင်မြင်တဲ့ ဆိုရှယ်လစ် စနစ်ကို ထူထောင်နိုင်မယ်ဆိုရင် ပြည်သူတွေက အခမဲ့ အိမ်ရာတွေ၊ ကျန်းမာရေးစနစ်တွေ၊ ပညာရေး အထောက်အပံ့တွေ ရရှိလာလိမ့်မယ်လို့ ချီးကျူး ပုံဖော်ထားခဲ့ပါတယ်။
သူ့ရဲ့ ကဗျာဟာ ၂၀၁၆ ခုနှစ်၊ နိုဝင်ဘာလတုန်းက မြောက်ကိုရီးယားမှာ ကျင်းပတဲ့ ကဗျာပြိုင်ပွဲ တခုမှာလည်း ဆုရခဲ့ဖူးပါတယ်။
မြောက်ကိုရီးယားကို လူသိရှင်ကြား ချီးကျူးဂုဏ်တင်ပြီး ဝါဒဖြန့်ပေးရင် ရာဇဝတ်မှုမြောက်တဲ့ ဥပဒေတရပ် တောင်ကိုရီးယားမှာ ရှိနေပါတယ်။ သူဟာ အဲဒီ ပြစ်မှုကို ကျူးလွန်တဲ့အတွက် ထောင်ဒဏ် ၁၀ လ ကျခံခဲ့ရဖူးပြီးသားပါ။
Public Service Announcement
ဒါပေမဲ့ လီက အမှတ်မရှိသေးဘဲ အဲဒီကဗျာကို အသုံးပြုရင်း အွန်လိုင်းကနေ ဝါဒဖြန့်တာတွေ ဆက်လုပ်နေတာကြောင့် ပြစ်မှုဟောင်းကို ထပ်ဆင့် ကျူးလွန်ကြောင်း ပြီးခဲ့တဲ့ သီတင်းပတ်မှာ ဆိုးလ်မြို့ တရားရုံး တခုက ဆုံးဖြတ်ပြီး ထောင်ဒဏ် ချမှတ်ခဲ့တာ ဖြစ်ပါတယ်။
အသက် ၆၈ နှစ်အရွယ် လီဟာ ၂၀၁၃ ခုနှစ်က မြောက်ကိုရီးယားရဲ့ စစ်အင်အား ကြီးမား ထည်ဝါမှုကို အွန်လိုင်းကနေ မြှောက်ပင့် ချီးကျူးခဲ့ဖူးသလို နောက်ပိုင်းနှစ်တွေမှာလည်း တောင်ကိုရီးယားကို ဆန့်ကျင်တဲ့ ဝါဒဖြန့်မှုတွေကို Blogတွေနဲ့ ဝက်ဘ်ဆိုက်တွေမှာ ရေးသားခဲ့တယ်လို့ တရားရုံးရဲ့ အမှုမှတ်တမ်းတွေမှာ ဖော်ပြထားပါတယ်။
တောင်ကိုရီးယား အမျိုးသား လုံခြုံရေး အက်ဥပဒေအရ အစိုးရကို ရန်လိုဆန့်ကျင်တဲ့ အဖွဲ့အစည်းတွေကို ချီးကျူး ဂုဏ်တင်ပေးတာကလည်း ဥပဒေ ချိုးဖောက်မှု မြောက်တယ်လို့ သိရပါတယ်။
