ဖိလစ်ပိုင်၊ အမေရိကန်နဲ့ ဂျပန် ရေတပ်တွေ ပူးပေါင်းပြီး တောင်တရုတ်ပင်လယ် ရေပြင်မှာ စစ်ရေးလေ့ကျင့်မှုတစ်ခု လုပ်ဆောင်ခဲ့ကြောင်း သိရပါတယ်။
မဟာမိတ်တွေကြား စစ်ရေး ပူးပေါင်းမှုတွေကို အရှိန်မြှင့်ဖို့ ရည်ရွယ်ပြီး သုံးနိုင်ငံ စစ်ရေးလေ့ကျင့်မှုကို အစပြုခဲ့တယ်လို့ ဖိလစ်ပိုင် စစ်တပ်က ဖေဖော်ဝါရီ ၂၇ ရက်နေ့မှာ ပြောကြားခဲ့ပါတယ်။ အခု လေ့ကျင့်မှုမှာ ပါဝင်တဲ့ သုံးနိုင်ငံစလုံးဟာ တရုတ်နဲ့ တင်းမာမှုတွေ အသီးသီး ရှိနေပါတယ်။
အမေရိကန်ဟာ တရုတ်ရဲ့ စူပါပါဝါ ပြိုင်ဘက်နိုင်ငံဖြစ်ပြီး ဂျပန်ကတော့ ထိုင်ဝမ်ကိုသာ တရုတ်က ကျူးကျော်ရင် ထိုင်ဝမ်ကိုကူဖို့ စစ်တပ်တွေ စေလွှတ်ပေးမယ်ဆိုတဲ့ ဂျပန် ဝန်ကြီးချုပ်ရဲ့ စကားကို အကြောင်းပြုပြီး တရုတ်နဲ့ ဆက်ဆံရေး အေးခဲနေပါတယ်။ ဖိလစ်ပိုင်ကတော့ တောင်တရုတ်ပင်လယ် ရေပိုင်နက် အငြင်းပွားမှုကြောင့် တရုတ်နဲ့ ပြဿနာတွေ ရှိနေပါတယ်။ တရုတ်ဟာ တောင်တရုတ်ပင်လယ် ရေပြင်တစ်ခုလုံးနီးပါးကို ပိုင်နက်အဖြစ် သတ်မှတ် ကြေညာထားတာကြောင့် ဖိလစ်ပိုင်အပြင် တခြား ဒေသတွင်း နိုင်ငံတချို့နဲ့ပါ အငြင်းအခုံတွေ ဖြစ်နေပါတယ်။
၂၀၂၃ ခုနှစ်ကစလို့ ဖိလစ်ပိုင်ဟာ နိုင်ငံရဲ့ ရေပိုင်နက် အချုပ်အခြာ ပိုမိုခိုင်မာစေရေး ရည်ရွယ်ပြီး တောင်တရုတ်ပင်လယ်ထဲမှာ တခြားမိတ်ဖက် နိုင်ငံတွေနဲ့ ပူးပေါင်းလုပ်ဆောင်မှုတွေကို အရှိန်မြှင့်တင်လာခဲ့ပါတယ်။
Public Service Announcement
လတ်တလော စစ်ရေးလေ့ကျင့်မှုမှာတော့ ဖိလစ်ပိုင်က Antonio Luna ဖရီးဂိတ် စစ်သင်္ဘောအပြင် တိုက်လေယာဉ် တချို့ကိုပါ ပူးပေါင်းပါဝင်စေခဲ့ပါတယ်။ ဂျပန်က P-3 Orion ရေကြောင်း ထောက်လှမ်းရေးနဲ့ ရေငုပ်သင်္ဘောဖျက် စစ်ဆင်ရေး လေယာဉ်တစ်စီးကို စေလွှတ်ခဲ့ပြီး အမေရိကန်ကတော့ ပဲ့ထိန်း ဒုံးကျည်တပ် USS Dewey ဖျက်သင်္ဘောနဲ့ Posiedon ကင်းလှည့်ရေယာဉ်တို့ကို ပို့ဆောင်ခဲ့ပါတယ်။
အဲဒီစစ်ရေးလေ့ကျင့်မှုဟာ ပင်လယ်ပြင်မှာ ရိက္ခာနဲ့ လှောင်စာ လွှဲပြောင်းဖြည့်တင်းမှု၊ လေယာဉ်နဲ့ ရေယာဉ်တွေကြား ဆက်သွယ်ချိတ်ဆက်မှု၊ သတ်မှတ်ရေပြင်ကို ကင်းလှည့်စစ်ဆေးမှုတွေ ပါဝင်ခဲ့ပါတယ်။
ဖိလစ်ပိုင်ဟာ အမေရိကန် ဩစတြေးလျ စစ်တပ်တွေနဲ့ ပူးပေါင်းပြီး ဖေဖော်ဝါရီ ၁၅ နဲ့ ၁၆ ရက်နေ့တွေမှာလည်း စစ်ရေးလေ့ကျင့်မှုတစ်ခု လုပ်ဆောင်ခဲ့ပါသေးတယ်။
ကိုးကား: Reuters
ဓာတ်ပုံ – AFP
