နာမည်ကြီးအရက်ဘီယာကုမ္ပဏီသုံးခု စစ်ကောင်စီကို ကျပ်ဘီလျံချီ အခွန်ငွေပေးနေ

ပြည်တွင်း၌ ဘီယာနှင့် အရက် ထုတ်လုပ်ရောင်းချနေသော နိုင်ငံတကာကုမ္ပဏီကြီးများဖြစ်သည့် Heineken၊ Carlsberg၊ ThaiBev တို့သည် အာဏာသိမ်းစစ်ကောင်စီထံ အခွန်ငွေ ကျပ်ဘီလျံချီ ပေးဆောင်နေသည်ဟု Justice For Myanmar (JFM) က ယနေ့ (ဧပြီ ၁၉) ထုတ်ပြန်သည်။

ထိုကုမ္ပဏီသုံးခုသည် ၂၀၂၁ အောက်တိုဘာမှ ဒီဇင်ဘာအထိ အထူးကုန်စည်ခွန်အတွက် ကျပ်ဘီလျံ ၅၀ ခန့်၊ ကုန်သွယ်လုပ်ငန်းခွန်နှင့် ဝင်ငွေခွန်အတွက် ကျပ် ၁၂ ဒသမ ၆ ဘီလျံခန့် စစ်ကောင်စီထံ ပေးဆောင်ခဲ့သည်ဟု စစ်တပ်ပိုင်စီးပွားရေးလုပ်ငန်းများကို စောင့်ကြည့်နေသည့် ထိုအဖွဲ့က ဆိုသည်။ 

ထိုအခွန်ငွေပမာဏသည် ပြင်ပပေါက်ဈေးထက် နှိမ့်ထားသည့် စစ်ကောင်စီ ဗဟိုဘဏ်သတ်မှတ်ငွေလဲနှုန်းဖြင့် တွက်ချက်လျှင်ပင် အမေရိကန်ဒေါ်လာ ၃၄ ဒသမ ၆ သန်းထိ ရှိသည်။

ကုမ္ပဏီသုံးခု၏ တစ်နှစ်ပတ်လုံးစာ အခွန်အရပ်ရပ်ပေးဆောင်မှုသည် စုစုပေါင်း ကျပ်ဘီလျံ ၂၅၀ (ဒေါ်လာ ၁၅၅) သန်းအထိ ရှိနိုင်ကြောင်း JFM က ဆိုသည်။

အာဏာသိမ်းပြီး နှစ်နှစ်ကျော်အတွင်း နိုင်ငံအနှံ့ လေကြောင်းတိုက်ခိုက်မှုများ ကျူးလွန်နေသည့် စစ်ကောင်စီကို အဖျော်ယမကာကုမ္ပဏီကြီးများက ကူညီပေးနေသည်ဟု JFM ပြောရေးဆိုခွင့်ရှိသူ မရတနာမောင်က ဆိုသည်။

“တရားမဝင်စစ်ကောင်စီက လူသတ်မှုနဲ့ ဖျက်ဆီးမှုတွေကို စဉ်ဆက်မပြတ်ကျူးလွန်နိုင်ဖို့အတွက် ဝင်ငွေတွေ အသည်းအသန်လိုအပ်နေပြီးတော့ အဖျော်ယမာကာကုမ္ပဏီကြီးတွေဆီက အခွန်ငွေတွေက ပြည်သူလူထုကို တိုက်ခိုက်ဖို့ လိုအပ်တဲ့ လေယာဉ်ဆီ၊ ကျည်ဆန်နဲ့ ဗုံးတွေ ဝယ်ယူဖို့ ရန်ပုံငွေကူညီပေးနေပါတယ်”။

ထိုဘီယာကုမ္ပဏီကြီးများသည် ကွယ်လွန်သူ ခရိုနီဦးသိန်းထွန်း၏ မိသားစုဝင်များနှင့် ပေါင်းကာ ပြည်တွင်း၌ အရက်၊ ဘီယာများ ထုတ်လုပ်ရောင်းချနေခြင်းဖြစ်သည်။ ဦးသိန်းထွန်း၏သား ဦးသန့်ဇင်ထွန်း ထိန်းချုပ်ထားသည့် Myanma Golden Star Grop (MGS) က Carlsberg ဘီယာထုတ်လုပ်နေပြီး LOTTE ကော်ပိုရေးရှင်းလက်အောက်ခံကုမ္ပဏီနှင့် ပေါင်း၍လည်း ဖျော်ရည်ထုတ်လုပ်သည်။

ဦးသိန်းထွန်း၏သမီး ဒေါ်မာမာထွန်းနှင့် သမက်ဖြစ်သူ ဦးအောင်မိုးကျော်တို့က နယ်သာလန်မှ Heineken အပြင် ထိုင်းနိုင်ငံမှ ThaiBev ကုမ္ပဏီတို့နှင့် ဖက်စပ်လုပ်ကိုင်သည်။ ထိုင်းနိုင်ငံအခြေစိုက် ThaiBev က ပြည်တွင်းအမှတ်တံဆိပ် Grand Royal အရက်ထုတ်လုပ်သည့်ကုမ္ပဏီကို ဝယ်ယူထားသည်။

ထိုကုမ္ပဏီများအနေဖြင့် အမျိုးသားညီညွတ်ရေးအစိုးရ (NUG) လမ်းညွှန်ချက်များနှင့် နိုင်ငံတကာလူ့အခွင့်ရေးဆိုင်ရာတာဝန်ရှိမှုများကို လိုက်နာရန် လိုအပ်ပြီး စစ်ကောင်စီကို ပေးနေသည့် အခွန်ငွေများကို ရပ်တန့်ရမည်ဖြစ်ကြောင်း JFM ပြောရေးဆိုခွင့်ရှိသူ မရတနာမောင်က ဆိုသည်။

စစ်တပ်အာဏာသိမ်းပြီးနောက် စစ်တပ်ထုတ်ကုန်တစ်ခုဖြစ်သည့် မြန်မာဘီယာကို ပြည်သူလူထုက ဝိုင်းဝန်းသပိတ်မှောက်သဖြင့် Heineken၊ Carlsberg ကဲ့သို့ အခြားဘီယာအမှတ်တံဆိပ်များသာ မြန်မာပြည်သူလူထုအတွက် ရွေးချယ်စရာဖြစ်လာသဖြင့် ဈေးကွက်ဝေစုလည်း တိုးမြင့်ရရှိနေကြသည်။

အသက် ၈၅ နှစ်အရွယ်တွင် ကွယ်လွန်ခဲ့သည့် ဦးသိန်းထွန်းသည် ဝါရင့်အဖျော်ယမကာလုပ်ငန်းရှင်တစ်ဦးဖြစ်ပြီး အင်္ဂလိပ်၊ မြန်မာနှစ်ဘာသာဖြင့် ထုတ်ဝေနေသော မြန်မာတိုင်း(မ်) သတင်းစာတိုက်ကို ၂၀၁၄ ခုနှစ်တွင် ဝယ်ယူခဲ့သည်။

ခေတ်အဆက်ဆက်တွင် စစ်ဗိုလ်ချုပ်များနှင့် ရင်းနှီးကျွမ်းဝင်သည်ဆိုသော စွပ်စွဲပြောဆိုချက်များကို ၁၉၆၀ ပြည့်လွန်နှစ်များကတည်းက စီးပွားရေးလောကတွင် ကျင်လည်ခဲ့သူ ဦးသိန်းထွန်းက သတင်းမီဒီယာများနှင့် တွေ့ဆုံတိုင်း ငြင်းဆန်လေ့ရှိသော်လည်း ဦးသိန်းစိန်လက်ထက်တွင် သမ္မတရုံးဝန်ကြီးဖြစ်ခဲ့သူ ဦးစိုးသိန်း၏ စာအုပ်ကို အကုန်အကျခံ ထုတ်ဝေပေးဖူးသည်။ ထွန်းဖောင်ဒေးရှင်းဘဏ်ပိုင်ရှင်လည်းဖြစ်သည့် ဝါရင့်စီးပွားရေးလုပ်ငန်းရှင် ဦးသိန်းထွန်းသည် စစ်တပ်က အာဏာသိမ်းပြီးနောက် ၂၀၂၂ ခုနှစ် ဧပြီလအတွင်းက ကွယ်လွန်ခဲ့သည်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)