ကယားပြည်နယ်၊ ဘောလခဲမြို့နယ် အရှေ့မြောက်ဘက်ရှိ စောလုံကျေးရွာကို ယနေ့ (မေ ၁၇) နံနက်အစောပိုင်းတွင် စစ်ကောင်စီတပ်က တိုက်လေယာဉ်ဖြင့် ဗုံးကြဲတိုက်ခိုက်ခဲ့ရာ အမျိုးသမီးငယ်တစ်ဦး သေဆုံးပြီး လေးဦး ဒဏ်ရာရသွားသည်။
နံနက် ၄ နာရီ မိနစ် ၂၀ ခန့်တွင် ဂျက်တိုက်လေယာဉ်ဖြင့် စောလုံကျေးရွာကို နှစ်ကြိမ်တိုင် ဗုံးကြဲခဲ့ခြင်းဖြစ်ကာ အသက် ၁၇ နှစ်အရွယ် အမျိုးသမီးတစ်ဦး သေဆုံးပြီး အမျိုးသား ၄ ဦး ဒဏ်ရာရခဲ့ခြင်းဖြစ်သည်။
“ဗုံးနှစ်လုံးကြဲတယ်၊ ဒါပေမဲ့ ကြဲတဲ့အချိန်မှာ ရွာသားတွေကလည်း နီးစပ်ရာတောထဲကို ပြေးနေကြတာဆိုတော့ ပြီးတော့ ညမှောင်နေချိန်ဆိုတော့ လေယာဉ်က တစ်စီးတည်းလား နှစ်စီးလားတော့ မသိဘူး” ဟု ဘောလခဲ-PDF အဖွဲ့၏ တပ်ရင်း (၁၁၀၅) မှ ပြန်ကြားရေးတာဝန်ခံ အမျိုးသားက ပြောသည်။
“အဲဒီအနီးအနား ပတ်ဝန်းကျင်မှာ တိုက်ပွဲဖြစ်တာဆိုတာလည်း မရှိဘူး၊ ထူးခြားမှုဖြစ်စဉ်ဆိုတာလည်း မရှိဘူးဗျ။ ဘာမှ ထူးခြားမှုမဖြစ်ဘဲ ဒီနေ့မနက်မှပဲ ဒီလိုအသံကြားတာ”
ဗုံးကြံတိုက်ခိုက်ခံရသဖြင့် ကျေးရွာဆေးပေးခန်းရှိ အဆောက်အအုံ ၂ လုံးနှင့် လူနေအိမ် ၆ လုံး ပျက်စီးခဲ့ကာ ဘုန်းကြီးကျောင်းတစ်ကျောင်း အနည်းငယ် ထိခိုက်ပျက်စီးပြီး ကျွဲ၊ နွား စသည့် အိမ်မွေးတိရစ္ဆာန်အချို့ သေဆုံးသည်ဟု သိရသည်။
စောလုံရွာသည် ဘောလခဲမြို့နယ် အရှေ့မြောက်ဘက် ၁၀ မိုင်ကျော်ခန့်အကွာ သံလွင်မြစ် အနောက်ဘက်ခြမ်းတွင် ရှိပြီး အိမ်ခြေ ၅၀ ကျော်သာ ရှိသည့် ရွာငယ်လေးတစ်ရွာဖြစ်သည်။
အရပ်သားကျေးရွာများကို စစ်ကောင်စီတပ်က ပစ်မှတ်ထားတိုက်ခိုက်မှုသည် ဘောလခဲမြို့နယ်အတွင်း သုံးကြိမ်မြောက်ဖြစ်သည်။ ယခုနှစ် ဧပြီလက သံလွင်မြစ်အရှေ့ဘက်ခြမ်းရှိ သစ်ထုတ်လုပ်ရေးစခန်းတစ်ခုနှင့် ယခု ဗုံးကြဲခံရသည့် စောလုံးရွာအနီးရှိ ဟော့ဟိုင်းရွာတို့ ဗုံးကြဲတိုက်ခိုက်ခံရပြီး ထိခိုက်ပျက်စီးမှုတော့ မရှိခဲ့ပေ။
ယခုလ ၉ ရက်တွင် ဘောလခဲမြို့ အရှေ့ဘက် ၁၂ မိုင်ကုန်းနှင့် ဝမ်မလန်းရွာဘက်သို့ စစ်ကြောင်းထိုးလာသည့် စစ်ကောင်စီတပ်ကို ကရင်နီအမျိုးသားများကာကွယ်ရေးတပ် (KNDF) B/21 နှင့် ကရင်နီတပ်မတော် (KA) တို့ ပူးပေါင်းတိုက်ခိုက်ခဲ့ရာ စစ်ကောင်စီဘက်မှ ၅ ဦး သေဆုံးပြီး သေနတ်တစ်လက် သိမ်းဆည်းရမိသည်ဟု သိရသည်။
ယင်းမတိုင်မီ ရက်အနည်းငယ်ကလည်း ဘောလခဲမြို့နယ်ရှိ ပွန်ချောင်းအရှေ့ဘက်ခြမ်း တံတားသစ်မှ စစ်ကြောင်းထိုးလာသည့် စစ်ကောင်စီတပ်ကို ဘောလခဲ-PDF က တိုက်ခိုက်ခဲ့သည်။
ဘောလခဲမြို့နယ်သည် စစ်ကောင်စီတပ်၏ ဗျူဟာစခန်းအခြေချရာ တပ်မြို့နယ်တစ်ခုဖြစ်ပြီး တပ်ရင်းအနေဖြင့် ခမရ ၄၃၀၊ ခမရ ၄၂၉ နှင့် ခမရ ၄၃၇ တို့အပြင် ထောက်ပို့ရေးတပ်များလည်း တပ်စွဲထားသည်။
“ဒေါတမကြီး ဒေါညှင်းခူဘက်ကို စစ်ကြောင်းထိုးတုန်းကတော့ လဲချားက ခမရ ၅၁၅ က စစ်ကူရောက်လာတယ်ပေါ့ဗျာ။ အဲဒါပြီးတော့ ၅ လပိုင်းမှာ မြို့ထဲ ဝင်တိုက်တော့ ၅၁၅ က စစ်ကူတွေကို ကျွန်တော်တို့ဘက် ပြန်ပို့လာတယ်လို့ ကြားရတယ်ဗျ” ဟု ဘောလခဲ-PDF ပြန်ကြားရေးတာဝန်ခံက ပြောသည်။
လတ်တလောတွင် ဘောလခဲမြို့နယ်အတွင်း စစ်ကောင်စီတပ်က အင်အားအများအပြားဖြင့် စစ်ကြောင်းထိုးနေဆဲဖြစ်သည်ဟု သိရသည်။
စစ်တပ်က အာဏာသိမ်းပြီးနောက် နိုင်ငံအနှံ့ ပေါ်ပေါက်လာသည့် လက်နက်ကိုင်တော်လှန်ရေးဒေသများတွင် ကရင်နီပြည်နယ်သည် တိုက်ပွဲအပြင်းထန်ဆုံးဒေသဟုပင် ဆိုနိုင်သည်။
ကရင်နီပြည်နယ်တစ်ခုလုံးနီးပါးတွင် စစ်ကောင်စီတပ်ကို KNDF, KA၊ မြို့နယ်အလိုက် PDF များနှင့် အခြားအဖွဲ့များက ပူးပေါင်းတိုက်ခိုက်နေသလို စစ်ကောင်စီတပ်ကလည်း လက်နက်ကြီးပစ်ကူနှင့် လေကြောင်းတိုက်ခိုက်မှုများ ပြုလုပ်ကာ အင်အားအလုံးအရင်းဖြင့် တိုက်ခိုက်နေသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီ လိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
