ဂျပန်နိုင်ငံ၊ အနောက်တောင်ပိုင်း ကူမာမိုတိုခရိုင်မှာ မနေ့က လှုပ်ခတ်ခဲ့တဲ့ အင်အားပြင်း ငလျင်ကြောင့် သေဆုံးသူ ၁၃ ဦးရှိလာပြီး အများအပြား ပျောက်ဆုံးနေတာကြောင့် သေဆုံးသူ ထပ်တိုးလာနိုင်တယ်လို့ The Japan Times သတင်းတစ်ရပ်မှာ ဖော်ပြပါတယ်။
ကယ်ဆယ်ရေးသမားတွေကတော့ အသက်ရှင်လျက် ကျန်ရစ်သူတွေကို ဆက်လက်ရှာဖွေနေဆဲ ဖြစ်ပါတယ်။ ပျောက်နေသူတွေကို ရှာဖွေဖို့နဲ့ အသက်ရှင် ကျန်ရစ်သူတွေကို ကယ်တင်နိုင်ဖို့ ရရှိနိုင်သမျှ အရင်းအမြစ်အားလုံးကို စုစည်း အသုံးပြုသွားမယ်လို့ ဂျပန်ဝန်ကြီးချုပ် စာနာအဲ တာကာအိချိက ပြောပါတယ်။
ပြင်းအား ၇.၁ အဆင့်ရှိတဲ့ ငလျင်ဟာ ဂျပန်ငလျင်တိုင်းတာမှုမှာ အမြင့်ဆုံးအဆင့်ဖြစ်တဲ့ shindo 7 အဖြစ် မှတ်တမ်းဝင်ခဲ့ပါတယ်။ ဒီငလျင်လှုပ်ခတ်မှုကြောင့် ဂျပန်နိုင်ငံ အနောက်တောင်ပိုင်း ခါရှီးမားမြို့မှာရှိတဲ့ စျေးဝယ်စင်တာတစ်ခု ပေါက်ကွဲခဲ့ပြီး အဆောက်အုံဟာလည်း ပြိုကျသွားခဲ့ပါတယ်။
နောက်ပြီး ဗုဒ္ဓဟူးနေ့ မွန်းလွဲပိုင်းအထိ ကူမာမိုတိုခရိုင်ရှိ အိမ်ထောင်စုပေါင်း ၃၅,၃ ၃၀ ကျော်လောက် လျှပ်စစ်မီး မရသေးပါဘူး။ ဒါ့အပြင် ကူမာမိုတို၊ စာဂါ (Saga) နှင့် နာဂါဆာကီ (Nagasaki) ခရိုင်တွေမှာလည်း အိမ်ထောင်စုပေါင်း ၈၄,၀၀၀ လောက် သောက်သုံးရေ ပြတ်တောက်နေဆဲဖြစ်ပါတယ်။
လတ်တလောမှာတော့ နောက်ဆက်တွဲငလျင်တွေ ဒီနေ့အထိ ဆက်တိုက် လှုပ်ခတ်နေတယ်လို့ The Japan Times သတင်းမှာ ဖော်ပြပါတယ်။ နောက်ထပ် ငလျင်ပြင်းငလျင်တွေ လှုပ်ခတ်လာနိုင်တာကြောင့် ပြည်သူတွေ အထူးသတိထားနေထိုင်ကြဖို့ ဂျပန်တာဝန်ရှိသူတွေက တိုက်တွန်းထားပါတယ်။
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် /qurium/myanmar-now.org/mm-members.html တွင် ကူညီနိုင်ပါသည်။
