ولادیمیر پوتین، رییس‌جمهور روسیه با اشاره به چالش‌ها و تهدیدهای امنیتی با منشأ افغانستان، بر گسترش همکاری روسیه با تاجیکستان در مبارزه با تروریسم و مواد مخدر تأکید کرده است.
به گزارش خبرگزاری تاس، پوتین پس از گفت‌وگو با امام‌علی رحمان، رییس‌جمهور تاجیکستان گفته است: «برای ارتقای صلح و ثبات در آسیا، روسیه همکاری‌های مبارزه با تروریسم و مواد مخدر را با تاجیکستان گسترش خواهد داد.»
پوتین افزوده است: «طبیعتا ما نمی‌توانستیم مسائل امنیتی در آسیای مرکزی را به‌ویژه با توجه به چالش‌ها و تهدیدهایی که از قلمرو افغانستان وارد می‌شود، لمس نکنیم.»
وی خاطرنشان کرده است که روسیه تصمیم دارد همکاری‌های دفاعی، نظامی و فنی، مبارزه با تروریسم و مواد مخدر را بیشتر کند.
رییس‌جمهور روسیه با اشاره به ایجاد یک پاسگاه مرزی در منطقه‌ی کوهستانی تاجیکستان در اواخر سال ۲۰۲۳ گفته است: «امروز ما توافق کردیم که به همکاری در این زمینه ادامه دهیم.»
روسیه و متحدانش در آسیای مرکزی بارها درباره‌ی نفوذ گروه‌های تندرو از شمال افغانستان ابراز نگرانی کرده‌اند.
در همین حال روسیه و اکثر کشورهای آسیای مرکزی، به‌جز تاجیکستان تعامل گسترده‌ی سیاسی و اقتصادی با طالبان برقرار کرده‌اند.