اطلاعات روز: په ملګرو ملتونو کې د افغانستان د استازولۍ سرپرست نصير احمد فايق په افغانستان کې د بشري حقونو د وضعيت په اړه د بشري حقونو د شورا په غونډه کې له دې شورا غوښتنه وکړه چې د طالبانو په وړاندې پرېکنده چلند وکړي. ده همدا راز د طالبانو پر خلاف د اغېزناکو او هدفمندو بنديزونو د لګولو په شمول د لا سختو اقداماتو غوښتنه وکړه.
فايق په خپلو خبرو کې وويل چې په افغانستان کې د بشري حقونو وضعیت په ځانګړې توګه د ښځو او نجونو او نورو لږکيو لپاره ډېر بد دی.
ده زياته کړه چې اوس مهال د افغانستان خلګ د طالبانو تر رژيم لاندې د بشري حقونو په برخه کې له سترو ننګونو سره مخ دي.
فايق د بشري حقونو له شورا څخه غوښتي چې په افغانستان کې د بشري حقونو د وضعيت په تړاو دې پرېکنده چلند وکړي. ده وويل چې د څارنې، راپور ورکولو او د طالبانو د پوښتلو لپاره د يوه مستقل څېړنيز بنسټ را منځ ته کول مهم دي.
په ملګرو ملتونو کې د افغانستان استازي زياته کړه چې ډېره مهمه ده چې نړيواله ټولنه د طالبانو پر خلاف د اغېزناکو او هدفي بنديزونو په شمول لا سخت اقدامات تر هغو وکړي چې د بشري حقونو په برخه کې بنسټيز پرمختګونه او همکارۍ نه وي ليدل شوې.
د بشري حقونو د شورا د ارزوونکې کاري ډلې غونډه د بشري حقونو په برخه کې د افغانستان د راپورونو او وضعيت د ارزونې لپاره نن جوړه شوه.
فايق وويل چې د افغانستان اسلامي جمهوريت (پخوانی حکومت) د روم د اساسنامې په ګډون نړيوال تعهدات لاسليک کړي وو او هغو ته ژمن و.
خو د ده په وينا، واک ته د طالبانو تر رسېدو وروسته دې ډلې د افغانستان له تعهداتو او مسووليتونو انکار کړی دی.
فايق زياته کړه چې د افغانستان پخواني حکومت له تروريزم سره د مبارزې او مالي تأمين په برخه کې قانون تصويب کړی و او هغه يې پلی کاوه.
ده وويل چې له تروريزم سره د مبارزې په برخه کې د افغانستان د پخواني حکومت هڅې واک ته د طالبانو له رسېدو سره سم ودرېدې او دې ډلې اوس افغانستان د القاعدې، داعش خراسان، ټي ټي پي او نورو ترهګرو ډلو لپاره د فعاليت په يوه چاپېريال بدل کړی دی.
فايق وويل چې د ملګرو ملتونو د بنديزونو په تحليلي راپور کې راغلي و چې طالبان د القاعدې په شمول له ترهګرو ډلو سره نژدې اړيکې لري.
ده زياته کړه چې له تروريزم سره د مبارزې په برخه کې طالبان په خپلو ژمنو کې ناکام دي.
همدا راز فايق وويل چې له تروريزم او نشيي توکو سره د مبارزې په برخه کې د طالبانو ادعاوې متناقضې دي. ده ادعا وکړه چې د طالبانو ځيني لوړپوړي مشران د تارياکو او هيروينو په شمول د نشيي توکو په توليد او قاچاق کې ښکېل دي.