اطلاعات روز: د صلاح الدين رباني په مشرۍ د افغانستان د جمعیت اسلامي ګوند په بدخشان کې د طالبانو پر خلاف لاريونونو ته په غبرګون کې ويلي، چې د دې لاريونونو او اعتراضاتو يوازينی لامل «د قوميت پر اساس ظلم، ستم او تبعيضونه دي.»
د دې ګوند اعلاميه چې نن (يکشنبه، ۱۶ د غويي) پر ايکس خپره شوې، په کې ليکل شوي چې «د طالبانو له لوري د بدخشان ولايت پر خلکو تعرض، د هغوی وژنه او له سپکاوي ډکه ځپنه په کلکو ټکو غندي».
د دې ګوند په اعلاميه کې راغلي: «د بدخشان وګړي او د افغانستان ټول خلک پوهېږي چې د طالبانو ډله له مستبدانه او ځانغوښتونکو کړو پرته د افغانستان د عزتمنو خلکو پر وړاندې بل هيڅ شرعي او د خير غوښتنې اراده نه لري او د يوې غير مسوولې نيابتي ډلې په توګه يې افغانستان يرغمل کړی او کړه يې صرف ترهګريز دي.»
جمعیت اسلامي افغانستان ګوند په بدخشان کې ځايي طالبانو ته ويلي، چې له دې ډلې سره همکاري «ضمير پلورنه او خيانت دی او بدخشانيان به هيڅکله هم داسې خيانت هير نه کړي».
دې ګوند زياته کړې: «د نورو د پاروونکو هدفونو د ترلاسه کېدو په لړ کې بايد د دې باطلې جګړې سون توکي نه شئ او د هغوی په نيابت بايد د خپلو خلکو پر وړاندې د دښمنۍ وسله وانخلئ او نه بايد اجازه ورکړئ چې د هغوی پر ارزښتونو، باورونو، کلتور او حيثیت تېری وشي.»
د دوو وروستيو ورځو پر مهال د بدخشان په «درایم» او «ارګو» ولسواليو کې د «طالبانو د ډزو له امله» د دوو ملکي وګړو تر وژل کېدو وروسته، په دې ولسوالیو کې د طالبانو پر خلاف پراخ لاريونونه وشول.
ځايي سرچينو اطلاعات روز ورځپاڼې ته ويلي، چې کله په دې دوو ولسوالیو کې ځايي خلکو د تارياکو د کښت د تخريب مخه ونيوله، د طالبانو له نشه يي توکو سره د مبارزې قطعې پر هغوی ډزې وکړې چې له کبله يې په درایم ولسوالۍ کې يو تن ووژل شو او همدا راز په ارګو ولسوالۍ کې هم يو تن مړ او پنځه تنه ژوبل شوي دي.
د سرچينو له خولې، په دواړو ولسوالیو کې د طالب ځواکونو تر ډزو او د ملکي خلکو تر وژل کېدو وروسته، ځايي خلکو اعتراضونه وکړل او «مرګ پر امارت» شعار يې ورکاوه.
طالبانو د خپل پوځ د لوی درستيز فصيح الدين فطرت په مشرۍ يو پلاوی ګمارلی تر څو دا لاريونونه وارزوي.