اطلاعات روز: د افغانستان، پاکستان او متحده عربي اماراتو د کریکیټ لوبډلو تر منځ د درې اړخیز شل اوریزې لړۍ په لومړۍ لوبه کې پاکستانۍ لوبډلې وکولای شول چې افغانستان ته د ۳۹ منډو په توپیر ماتې ورکړه.
دا لوبه چې نن (جمعه، ۷ د وږي) په متحده عربي اماراتو کې ترسره شوه، پاکستانۍ لوبډلې لومړی د توپ وهنې په کولو سره د اوو لوبغاړو په سوځېدو ۱۸۲ منډې وکړې.
افغان لوبډلې یې په ځواب کې وکولای شول چې د ټولو لوبغاړو په سوځېدو یوازې ۱۴۳ منډې وکړي او د ۳۹ منډو په توپیر یې لوبه بایلوده.
د افغانستان له لوري د توپ اچونې په برخه کې فرید احمد دوه او راشد خان، محمد نبي، عظمت الله عمرزي او مجیب الرحمان یوازې یو مقابل لوبغاړی وسوځاوه.
ټاکل شوې ده چې د شل اوریزو لوبو د روانې لړۍ په لړ کې سبا پاکستان او متحده عربي امارات سره مخامخ شي.