اطلاعات روز: د ملګرو ملتونو کارپوهانو د پاکستان له دولت څخه غوښتي، چې د افغان کډوالو د ایستلو پلان شوې پروسه ودروي او خپلو نړيوالو ژمنو ته درناوی وکړي.
دې کارپوهانو پرون (جمعه، ۷ د وږي) په یوې ګډې بیانیې کې د بشري حقونو د پراخو سرغړونو د اندېښنو په یادولو سره په ځانګړي ډول د ښځو او نجونو د آزادۍ، کار او زدهکړو د محرومیت په اړه ویلي، چې په پاکستان کې میلیونونه کډوال له دې ګواښ سره مخ دي چې بېرته داسې هېواد ته واستول شي چې د روان بشري بحران سره د مقابلې توان نه لري.
د پاکستان حکومت د سپتمبر لومړۍ نېټه د ستنېدلو وروستۍ نېټه ټاکلې ده. په دې پړاو کې د «پي او آر» کارت لرونکي هم شامل دي.
په پاکستان کې میشت کډوال هغه کسان دي چې لسیزې مخکې کډوال شوي یا هلته زیږیدلي دي. د ملګرو ملتونو کارپوهانو ویلي، چې د دې کډوالو څخه ځینې یې پخواني پوځي او دولتي کارمندان دي چې پاکستان ته تللي او په نورو هیوادونو کې د پناه غوښتنې په لټه کې دي.
د ملګرو ملتونو کارپوهانو ویلي: «پاکستان د نړيوالو بشري حقونو او د کډوالو د قوانینو پر بنسټ مکلف دی چې هېڅوک بېرته هغه ځای ته ونه لېږي چې د هغوی ژوند يا ازادي له جدي ګواښونو سره مخ وي.»
هغوی ټینګار کړی، چې د نه ستنېدلو مکلفیت اختیاري نه دی، بلکې د نړيوالو تړونونو او عرفي نړيوال قانون یو بنسټیز اصل دی چې باید رعایت شي.
د ملګرو ملتونو کارپوهانو ويلي، ډېری هغه کډوال چې د ایستلو له ګواښ سره مخ دي، په افغانستان کې د ستنېدلو لپاره کور نه لري او د کورنۍ او ټولنې د ملاتړ له شبکو څخه هم بې برخې دي.
دوی وویل: «موږ په ځانګړي ډول د هغو کورنیو د وضعیت په اړه چې د ښځو له لوري رهبري کېږي او هغه کسان چې محرم (نارینه سرپرست) نه لري اندیښمن یو.»
کارپوهانو یادونه کړې، چې نورې ډلې، لکه د امنیتي ځواکونو غړي او پخواني حکومتي چارواکي او جنسي اقلیتونه هم په افغانستان کې د ځورونې او تاوتریخوالي له خطر سره مخ دي.
د دوی په وینا: «موږ له د پاکستان له دولت غواړو چې سمدستي د پلان شویو ایستنو مخه ونیسي او د نه ستنېدلو اصل ته درناوی وکړي.»
کارپوهانو له نړیوالې ټولنې غوښتي چې د پاکستان له حکومت او کوربه ټولنو سره خپل ملاتړ زیات کړي.
دوی له دې سره سره د هغو حکومتونو د پروګرامونو د کمښت او ودریدو له امله چې افغان اتباعو ته یې د بیا مېشتېدو ژمنه کړې وه، خواشیني ښودلې او ویلي دي چې دغه هېوادونه د نړيوالې همغږۍ اصولو او د کډوالو کوربه هېوادونو سره د ګډ مسوولیت له اصولو شا ته شوي دي.