امریکا د طالبانو هغه غوښتنه رد کړې چې په افغانستان کې د کانونو په برخه کې دې پانګونه وکړي، او ویلي یې دي چې له «ترهګرو» سره تعامل نه کوي.
د امریکا د بهرنیو چارو وزارت یوه ویاند د امریکا غږ د پوښتنې په ځواب کې ویلي چې واشنګټن په افغانستان کې د کانونو د پراختیا په برخه کې له طالبانو سره، چې د «نړیوالې ترهګرې ډلې» په توګه یې یاد کړي، د تعامل هېڅ پلان نه لري.
د امریکا د بهرنیو چارو وزارت دغه ویاند زیاته کړې: «د دې کار ترسره کول (په افغانستان کې د کانونو په برخه کې د امریکا پانګونه) یوازې کولی شي پیسې د طالبانو لاس ته ورسېږي او له افغانانو سره د هغوی ناوړه چلند ته زمینه برابره کړي.»
د طالبانو د بهرنیو چارو وزیر، امیرخان متقي، له فایننشل ټایمز سره په خبرو کې ویلي وو چې طالبان په افغانستان کې د کانونو په برخه کې د امریکا د پانګونې هرکلی کوي.
د طالبانو ویاند، ذبیحالله مجاهد، هم نن ویلي چې طالبان له امریکا سره د ښو اړیکو غوښتونکي دي او افغانستان له امریکا سره ډیپلوماټیکو او اقتصادي اړیکو ته اړتیا لري.
طالبانو له افغانستان څخه د بیا واکمنېدو راهیسې څو ځله له امریکا سره د ډیپلوماټیکو اړیکو غوښتنه کړې او د «ښه نیت» د څرګندولو په توګه یې څو امریکايي بندیان هم خوشې کړي دي.
خو واشنګټن تر اوسه له طالبانو سره رسمي تعامل ته لېوالتیا نه ده ښودلې او امریکايي چارواکي په خپلو رسمي څرګندونو کې لا هم طالبان یوه «ترهګره ډله» بولي.
