د ملګرو ملتونو د خوړو او کرنې سازمان (فائو) ویلي چې اټکل کېږي د النینو (El Niño) پدیدې له امله د ۲۰۲۶/۲۷ لندبل موسم پر مهال په ټول افغانستان کې د منځنۍ کچې په پرتله د زیاتو بارانونو او لندبل شرایطو احتمال زیات شي. د دغه سازمان په وینا، دا وضعیت د اوبو د لاسرسي او د کرنې د وضعیت د ښه کېدو لپاره زمینه برابرولی شي.
خو فائو ویلي چې د بارانونو او واورې د ویلې کېدو زیاتوالی ښايي په ځینو سیمو کې د سیمهییزو سېلابونو خطر هم لوړ کړي.
دغه سازمان ټینګار کړی چې د وضعیت دوامداره څارنه، پر وخت د کرنیزو سپارښتنو وړاندې کول او د سېلابونو پر وړاندې چمتووالی اړین دی، څو له احتمالي فرصتونو ګټه واخیستل شي او په ورته وخت کې خطرونه راکم شي.
النینو هغه اقلیمي پدیده ده چې د استوایي آرام سمندر په مرکزي او ختیځو برخو کې د سمندر د سطحې د تودوخې له زیاتېدو سره رامنځته کېږي. دا پدیده معمولاً په هرو دوو تر اوو کلونو کې یو ځل رامنځته کېږي او شاوخوا له نهو تر ۱۲ میاشتو دوام کوي.
د النینو پدیده په ځینو سیمو کې د بارانونو او سېلابونو د زیاتېدو لامل کېږي، خو په ځینو نورو سیمو کې وچکالي او ګرمي لا پسې زیاتولی شي.
د هوا پېژندنې نړیوال سازمان د تازه اټکلونو له مخې، النینو په چټکۍ د پیاوړي کېدو په حال کې دی او تمه کېږي چې دغه بهیر د ۲۰۲۶ کال تر پایه دوام وکړي.
د ۲۰۲۶/۲۷ مني او ژمي پر مهال د یوې ډېرې پیاوړې النینو پدیدې د رامنځته کېدو احتمال له ۹۰ سلنې څخه زیات اټکل شوی دی. همداراز، د ۲۰۲۶ کال د اکتوبر او ډسمبر ترمنځ د دې پدیدې د تاریخي کچې د شدت احتمال ۶۹ سلنه اټکل شوی دی.
فائو ویلي چې د النینو د اغېزو د رامنځته کېدو وخت او شدت لا هم روښانه نه دی، خو په افغانستان کې النینو په تېرو وختونو کې معمولاً په ژمي او پسرلي کې له منځنۍ کچې څخه د زیات لندبل او بارانونو له شرایطو سره مل و.
دغه سازمان ویلي چې وړاندوینې د ۲۰۲۶ کال په وروستیو کې د هند په سمندر کې د مثبت شاخص (IOD) د رامنځته کېدو احتمال هم ښيي. که دغه دواړه اقلیمي عوامل په یو وخت رامنځته شي، ښايي په ۲۰۲۶/۲۷ کال کې د یوه نسبتاً لوند موسم احتمال زیات شي؛ خو د مثبت IOD د رامنځته کېدو د وخت او شدت په اړه لا هم ابهام موجود دی.
فائو ویلي چې په ژمي او پسرلي کې د زیاتو بارانونو احتمال کولی شي د خاورې د لندبل، د واورو د زېرمو او اوبو ته د لاسرسي له زیاتېدو سره د ژمنیو فصلونو، څړځایونو او اوبو سرچینو لپاره ګټور تمام شي.
خو په ورته وخت کې، د زیاتو بارانونو او د واورې د زیاتې راټولېدو له امله ښايي د سیمهییزو سېلابونو، ځمکې ښوېدنې او کرنیزو ځمکو او زیربناوو ته د زیان رسېدو خطر هم زیات شي.
