بنون سیوان، قبرصي ډیپلومات او په افغانستان کې د ملګرو ملتونو پخوانی استازی، د ۸۸ کلونو په عمر مړ شو.
د سیوان له کورنۍ سره نږدې یوې سرچینې د دوشنبې شپې (۱۳ میزان) له بيبيسي سره په خبرو کې د هغه مړینه تایید کړې ده. نوموړی د قبرس په پلازمېنه نیکوزیا کې اوسېده.
سرچینې زیاته کړې چې د دغه پخواني ملګرو ملتونو ډیپلومات د مړینې کره لامل لا نه دی معلوم.
سیوان په افغانستان کې د ۱۹۹۰مې لسیزې له تحولاتو سره د تړلو له پېژندل شویو څېرو څخه و.
سیوان په ۱۹۸۸ کال کې، هممهاله له افغانستان د بحران د حل او له دغه هېواد څخه د شوروي ځواکونو د وتلو په اړه د جنیوا تړون له لاسلیک سره، د افغانستان لپاره د ملګرو ملتونو د سرمنشي د استازي د سیاسي چارو د مدیر او لوړپوړي سلاکار په توګه وټاکل شو.
هغه په ۱۹۹۰ کال کې د جنیوا تړونونو د پلي کېدو د څارنې مسوولیت پر غاړه واخیست او یو کال وروسته د افغانستان لپاره د ملګرو ملتونو د بشري او اقتصادي مرستو د پروګرامونو د مدیریت او همغږۍ چارې هم هغه ته وسپارل شوې.
سیوان څو ورځې وړاندې له بيبيسي دري سره په مرکه کې د افغانستان د وروستي چپګرا ولسمشر نجیبالله احمدزي د حکومت د ړنګېدو، د موقت حکومت د جوړولو لپاره د جهادي ډلو د هڅو د ناکامۍ او په هېواد کې د کورنیو جګړو په اړه خبرې کړې وې.
هغه په دې مرکه کې ویلي وو چې د ۱۹۹۲ کال په اپرېل کې، هغه مهال چې د مجاهدینو مشران د موقت حکومت پر جوړولو هوکړې ته ونه رسېدل، له پاکستانه کابل ته راغی او غوښتل یې نجیبالله احمدزي د ملګرو ملتونو په الوتکه کې له کابله وباسي، خو دا هڅه ناکامه شوه.
په افغانستان کې د سیوان ماموریت په ۱۹۹۲ کال کې پای ته ورسېد او وروسته د ملګرو ملتونو د سرمنشي د سیاسي چارو د مرستیال په توګه وټاکل شو.
له دې وروسته افغانستان د جهادي ډلو ترمنځ په کورنۍ جګړه کې ښکېل شو او له همدې وضعیت څخه طالبان راڅرګند شول. دغې ډلې په ۱۹۹۶ کال کې کابل ونیو او په لومړي اقدام کې یې نجیبالله احمدزي له خپل ورور سره یوځای اعدام کړ.
سیوان په خپله وروستۍ مرکه کې د نجیبالله د برخلیک په اړه د ملګرو ملتونو پر کړنو نیوکه کړې وه او ویلي یې وو چې د ده په باور، دغه سازمان د نجیبالله د انتقال او ژغورنې لپاره «په کافي اندازه هڅه ونه کړه».
