İraqın qərbindəki Əl Əsəd aviabazasına iki “Katyuşa” raketi atılıb
Avqustun 5-də İraqda hərbi bazaya hücum olub. Hücum zamanı azı 5 ABŞ hərbçisinin yaralandığı bildirilib.
ABŞ rəsmiləri “Reuters” agentliyinə bildiriblər ki, İran və onun müttəfiqləri tərəfindən keçən həftə HƏMAS-ın yüksək rütbəli üzvlərinin öldürülməsindən sonra Yaxın Şərq mümkün yeni hücum dalğasına hazırlaşır.
İraqın qərbindəki Əl Əsəd aviabazasına iki “Katyuşa” raketi atılıb. İraq təhlükəsizlik mənbələrindən biri raketlərin bazanın içərisinə düşdüyünü bildirib. Hücumun İranın HƏMAS liderinin öldürülməsinə cavab vermək təhdidləri ilə əlaqəsi olub-olmadığı bəlli deyil.
Adının açıqlanmasını istəməyən ABŞ rəsmiləri yaralı amerikalılardan birinin ağır olduğunu bildirib:
“Baza heyəti hücumdan sonrakı zərərin qiymətləndirilməsini aparır”.
Fələstinin İslamçı HƏMAS qruplaşmasının siyasi lideri İsmayıl Haniyə keçən həftə İranın paytaxtı Tehranda öldürülüb. İran qətldə İsraili günahlandırsa da, İsrail məsuliyyəti üzərinə götürməyib.
Livanın Hizbullah qruplaşmasının yüksək rütbəli hərbi komandiri Fuad Şükrün İsrailin ötən həftə Beyruta endirdiyi zərbə ilə öldürülməsi Qəzzada münaqişənin daha geniş Yaxın Şərq müharibəsinə çevrilməsi ilə bağlı narahatlığı artırıb.
İran İsraili dəstəklədiyi üçün Haniyənin qətlində ABŞ-nin məsuliyyət daşıdığını bildirib.
Pentaqonun məlumatına görə, ABŞ-nin müdafiə naziri Lloyd Austin və İsrailin müdafiə naziri Yoav Gallant hücumun “təhlükəli eskalasiya” olduğunu qeyd edib.
