Qaçqın və Məcburi Köçkünlərlə İş üzrə Dövlət Komitəsinin sədri Əli Həsənovun nəvəsi Nail Allahverdiyev həbsinə səbəb olmuş hadisənin necə baş verdiyini danışıb. O, dekabrın 5-də öz məhkəməsində bu haqda ifadə verib.
N.Allahverdiyevin işinə Bakı Ağır Cinayətlər Məhkəməsində Əhməd Quliyevin sədrlik etdiyi hakimlər kollegiyası baxır.
Nail Allahverdiyev sürəti niyə artırıb
Jurnalistlər prosesə buraxılmadığından, AzadlıqRadiosu məhkəmədə olub-bitənləri vəkillərdən öyrənib. Bugünkü məhkəmədə N.Allahverdiyevin ifadəsindən öncə hadisə yerində olmuş «Mazda»nın sürücüsü Mirməhəmməd İsmayılov dindirilib. «Maqa» ləqəbli şahid deyib ki, hadisənin onlar yolda ötüşərkən baş verməsi haqda yayılan söz-söhbətlər yalandır. Onun sözlərinə görə, xeyli vaxt idi Naillə bir-birini görmədiklərindən həmin gün Mərdəkanda görüşüblər. Axşam saatlarında də evə qayıtmaq üçün birlikdə çıxıblar – hərə öz maşını ilə.
«Ardıcıl gəlirdik. Birdən Nailgil sürəti artırdılar, uzaqlaşdılar. Zəng elədim, telefona cavab vermədi. Mən onlara çatanda artıq hadisə olmuşdu», – M.İsmayılov bildirib.
N.Allahverdiyev isə avtomobili yüksək sürəklə idarə etməsinin səbəbini həmin vaxt maşında olan, hadisə nəticəsində dünyasını dəyişmiş Mehdi Əliyevin səhhətindəki problemlərlə izah edib. Onun sözlərinə görə, Mehdinin ürəyi ağrıyırdı, onu təcili çatdırmaqdan ötrü sürəti artırıb.
«Mən qaçmamışam»
Komitə sədrinin nəvəsi onu da bildirib ki, hadisə yerindən qaçması haqda yazılanlar, deyilənlər yalandır. Onun vəkili də hadisə yerindən qaçmağa görə CM-nin 264-cü maddəsi ilə verilmiş ittihamın çıxarılmasını istəyib. Müdafiəçi istintaqdan da gileylənib. Deyib ki, ibtidai istintaq qərəzli aparılıb.
Bundan öncə isə mərhum M.Əliyevin həyat yoldaşı Ülviyyə Əliyevazərərçəkmiş qismində ifadə verib. Bildirib ki, N.Allahverdiyevdən şikayətçi deyil. Həyat yoldaşı ilə Nailin dost olduğunu deyən zərərçəkmiş təqsirləndirilən şəxsə həbslə bağlı olmayan cəza verilməsini istəyib. Deyib ki, əmindir, əgər sükan arxasında onun həyat yoldaşı olsaydı, belə hadisə qarşı tərəfin başına gəlsəydi, onlar da şikayətçi olmayacaqdılar.
Daha bir zərərçəkmiş – qəzada dünyasını dəyişmiş piyada Vaqif Əsədovun oğlu Ramiz Əsədov da ifadəsində şikayətçi olmadığını deyib. Hadisədən danışan zərərçəkmiş söyləyib ki, atasının işdən qayıtmadığını görüb polisə xəbər verib. Bir qədər sonra ona kişi meyiti göstəriblər. O, atasının meyitini tanıyıb.
Təkrar ekspertiza istəyirlər
Məhkəmədə N.Allahverdiyevin müdafiəçiləri təkrar avtotexniki ekspertizanın keçirilməsi haqda vəsatət qaldırıblar. Vəsatət təmin olunmayıb.
Daha sonra məhkəmə istintaqının tamamlanması haqda qərar çıxarılıb.
Məhkəmə dekabrın 11-də davam edəcək. Növbəti iclasda prokuror çıxış edib, təqsirləndirilən şəxsə cəza istəyəcək. (azadliq.org)
Oxunub: 776
