“Evinizdə yanğın varsa, gücünüzü toplayıb küçəyə çıxmalısınız…”
Doğrudan da, paytaxtlar niyə küçələrdə?
Yaxın günlərdə BBC Türkiyə bölümü “6 paytaxt nədən küçələrdə?” adlı qısa bir video-film hazırlayıb. Doqquz dəqiqəlik film Bakıdakı 19 oktyabr mitinqindən başlayır və İngiltərə, Livan, Çili, İspaniya və Honq-Konqdakı etiraz aksiyaları ilə davam edir. Filmin alt yazılarında da etiraz aksiyalarının nədən düzənləndiyi haqqında qısa məlumatlar verilir. Heç kəs əyləncə xatirinə küçələrə çıxıb polisə üz-üzə dayanmır, hər ölkənin, hər xalqın özünə görə ciddi səbəbləri var. Maraqlıdır, bəs nədən hər kəs probleminin həllini məhz küçəyə çıxmaqda görür? Nədən İngiltərə kimi demokratiya ənənələri olan ölkənin vətəndaşları evində oturub sakitcə etiraz səsini hökumətə çatdırmır? Adını unutduğum bir xarici politoloq TV proqramında bunun cavabını belə vermişdi: “Evinizdə yanğın varsa, divarlar səsinizin duyulmasına mane olacaq, eşidilmək üçün var gücünüzü toplayıb küçəyə çıxmalısınız.” Gözəl ifadə olunub, deyilmi? İndi gəl də, bunu ofisində oturub 26 illik Əliyev diktaturasının seçki və ya islahatlarla dəyişəcəyini deyənlərə anlat! Təbii, anlada bilsən…
Hörmət etdiyimiz, lakin mövgeyi ilə razı olmadığımız Erkin Qədirli “mitinqlərinə qatılmağımız yanlış olacaq” deyirsə…
Söhbətin kimlərdən getdiyini bildiniz yəqin ki. “Real parlament seçkilərinə hazırlaşmalı, mitinq və küçə tədbirlərinə resurslarını xərcləməməlidir. Seçkilərə qədər mitinq təşkil etməyə girişməyimiz, ya da başqalarının mitinqlərinə qatılmağımız yanlış olacaq.” Bu fikirlər ReAL İdarə Heyətinin üzvü Erkin Qədirliyə məxsusdur. Bəlkə, heç bu sözlərin bir partiyanın rəhbərliyində təmsil olunan şəxsə aid olduğuna inanmağınız gəlməyəcək. Təbii, Qədirlinin sözlərini uzun-uzadı şərh etmək, yanaşmanın kökündən yanlış olduğunu isbat etmək də olar. Amma məsələyə onun öz diliylə dediyi “məndən siyasətçi çıxmaz” sözləri ilə də nöqtə qoymaq olar və belə də edirik. E. Qədirlidən fərqli olaraq, əvvəllər siyasi mübarizədə kütləvi aksiyaların rolunu inkar edən ReAL sədri İlqar Məmmədovun fikirlərində xeyli dəyişiklik var: “Kütləvi aksiyaya ictimai münasibət də dəyişməlidir. İndiyədək bəzi adamların təqdimatında mitinq inqilabın giriş qapısı idi. Bu yanaşmadan imtina önəmlidir. Aksiya ilk növbədə dinc və qətiyyətli mövqe ifadəsidir.” İlqar Məmmədov bizimlə razıdır.
Mitinqlər-müasir dünyada sınaqdan çıxmış ən təsirli vasitədir
ReAL-da iki aparıcı şəxsin bir-birinə əks fikirlərini tutuşdurub, vahid siyasi mövqenin nədən ibarət olduğunu anlaya bilmədik. Deyəsən, heç özləri də bu məsəldə yekdil qərara gələ bilməyiblər. Biz açıq şəkildə kütləvi mitinqlərin tərəfdarı olduğumuzu deyirik. Kimsə bizi bu şərtlərdə, bu mürtəce komissiyalar ilə seçkilərə gedib, nəyəsə nail olmaq nağılına inandıra bilməz. Bənzər seçkilərdə dəfələrlə bizim qələbəmizi oğurlamış bir hakimiyyətdən söhbət gedir. Biz bu qəlibləşmiş diktaturanın islahat şousuna da inanmırıq. Açıq şəkildə deyirik ki, siyasi dəyişikliklərin diskussiyalar, dəyirmi masalar yolu ilə həll olunacağına inanmaq özünü aldatmaqdan başqa bir şey deyil. Biz deyirik ki, ölkədə acı çayır kimi dərinliklərə kök salmış 26 illik hakimiyyətin istefasına yalnız yüz minlərin qatıldığı mitinqlər sayəsində nail olmaq mümkündür. Bizim mövqeyimizi xalqın tələbləri və istəkləri müəyyənləşdirir. O mitinqləri tələb edən də xalqın özüdür, biz yox. 90-cı illərdə siyasi proseslərin gedişini nə müəyyənləşdirirdi, sizcə? Xalqın gücü. İndi məhz o mərhələyə gəlib çıxmışıq. Bu ölkənin taleyini dinc aksiyalar dəyişəcək. Biz bu məsələdə illərdir ortaya qoyduğumuz siyasi mövqeyə sədaqətliyik. Bu həm də müasir dünyada sınaqdan çıxmış ən təsirli vasitədir. Əksini iddia edən birbaşa hakimiyyət üçün yanğınsöndürən rolu oynamış olur.
Biz çox istərdik ki, Real Partiyası bizimlə olsun mitinqlər və kütləvi aksiyalar zamanı, ona görə ki, diktatura ilə mübarizədə dinc aksiyalar ən effektiv yoldur.
Hikmət