Bakı Apelyasiya Məhkəməsində AXCP təşkilat şöbəsinin üzvü Elnur Yusubov barədə inzibati həbs qərarından verilən şikayətə baxılıb.
Hakim Habil Məmmədovun sədrliyi ilə keçən prosesdə Elnur Yusubov özü də iştirak edib. AXCP fəalı barəsində tərtib olunmuş protokolun saxta, həbsinin qanunsuz olduğunu bildirib. Özünün inzibati həbsinin son günlər AXCP-yə qarşı represiyanın tərkib hissəsi olduğunu məhkəmə heyətinə çatdırıb.
Şikayət təmin olunmayıb. Vəkil qeyd edib ki, qərardan Avropa İnsan Haqları Məhkəməsinə şikayət göndəriləcək.
Elnur Yusubovu 26.07.2020-ci il tarixində üç nəfər mülki geyimli şəxsi avtomobilindən zorla düşürdüb və naməlum istiqamətə aparmışdı. Yalnız iki gün sonra onun Xətai RPİ-nin 37-ci Polis Şöbəsində olduğu bilinmişdi. Onun həmçinin Baş Prokurorluğun İstintaq İdarəsində dindirildiyi də məlum olmuşdu.
AXCP Təşkilat Şöbəsinin üzvü Elnur Yusubov barəsində İnzibati Xətalar məcəlləsinin 211.1-ci maddəsi ilə 30 sutka inzibati həbs qərarı seçilmişdi. Qərarı Xətai Rayon Məhkəməsinin hakimi İbrahim İbrahimli vermişdi.
Azadliq.info