AXCP Əli Kərimli
Belarus xalqının çox ağır şərtlər altında apardığı azadlıq uğrunda mübarizə hər cür təqdirə layiqdir.
Mübarizə hətta bu mərhələdə qələbə ilə nəticələnməsə belə, belarus xalqı azadlığa gedən yolun mühim bir hissəsini artıq qət etmiş oldu.
Bütün dünya, ilk növbədə belarus xalqı özü gördü və bir daha əmin oldu ki, yaradılmış miflərin əksinə olaraq xalq Lukaşenkonu sevmir və ona səs vermir. Lukaşenko yalnız çılpaq fiziki gücün hesabına hələlik hakimiyyətdə qalır.
Seçki saxtakarlığına elliklə etirazdan sonra belarus xalqının özgüvəni artacaq. Onlar əmin oldular ki, lidersiz də hamılıqla etiraz etmək mümkündür. Qorxuya qalib gəlmək mümkündür. Qorxusuna qalib gəlmiş 10 minlərlə belarus vətənpərvəri tarix yazır. Qorxusuna qalib gələn azadlıq carçılarının sayı 10 yox, 100 minlər olanda xalqın qələbəsi labüd olacaq. Qorxusuna qalib gələn xalqlar məğlubedilməz olurlar.
Belarus xalqı da bir gün mütləq qalib gələcək. Lukaşenko isə digər tiranlarla birlikdə tarixin qara səhifəsinə çevriləcək.
Belarus xalqının fədakar mübarizəsi tək Lukaşenkoya deyil, həm də dünyadakı avtoritar rejimlər “ailəsinə” böyük zərbə vurdu. Bütün dünya bu zorakı rejimlərin nə qədər saxtakar, qəddar, anti-xalq və anti-insani olduğunu bir daha gördü.
Beynəlxalq aləmdə daha çox insan anladı ki, hansısa maraqlar naminə belə anti-insani rejimlərin zalımlığına göz yummaq, onları himayə etmək demokratik dəyərlərə və əxlaqi prinsiplərə xəyanətdir.
İlham Əliyevin hakimiyyəti əslində zorla zəbt etmiş Lukaşenkonu ilk sıralarda, həm də “inamlı qələbə” münasibətilə təbrik etməsi Azərbaycanı beynəlxalq aləmdə təcridə aparan növbəti səhv addımdır. Azərbaycan xalqının istək və maraqlarını əks etdirmir.
Uzun illərdir ki, hüquq və azadlıqları, o cümlədən özünə hökumət və parlament seçmək hüququ əlindən alınmış azərbaycan xalqı dünyanın hər yerində tiranlarla mübarizə aparan xalqların mübarizəsini dəstəkləyir, böyük M.Ə.Rəsulzadənin sözlərinə qoşularaq “insan haqlarından yana olan tərəfin sonda qalib gələcəyinə” inanır və bütün qəlbilə dünyanın bütün xalqlarına azadlıq arzu edir.
Yazını AXCP sədri Əli Kərimlinin səhifəsinin admin heyəti paylaşıb