Qeyd etdiyimiz kimi 14 iyul Orduya dəstək yürüşündə iştiraka görə xeyli sayda vətəndaşa İXM-nin 211.1 maddəsi ilə inzibati həbs verilib. Onlardan 16 nəfəri AXCP üzvüdür. Demək olar ki, siyasi kimliyi olanların hamısının həbs qərarından apelyasiya şikayəti verilib. Bunu görən “hüquqçular” ən son inzibati həbs olunanlarla ( əsasən 28.07.2020-ci il tarixdən sonra) bağlı yeni texnologiyaya əl atıb. Vəkillər müvəkkilləri ilə görüş üçün gedəndə ilk olaraq vəkili “yola verməyə” çalışıblar. Bununla müəyyən vaxt əldə edib özləri həbs olunanlar adından “inzibati xəta törətmələrini etiraf” etməklə apelyasiya şikayəti veriblər.
Birincisi, əgər ortada həqiqi “etiraf” varsa bu icraat heç məhkəməyə çıxmazdı, yerində başqaları kimi protokolla cərimə olunub buraxılardılar. ikincisi, bu “etiraf” həqiqətən təzyiq vasitəsi ilə deyilsə, elə inzibati təqibə məruz qalan bunu birinci instansiya məhkəməsində edərdi. Bu hal olubsa onda nə səbəbdən həmin şəxslərə 30 sutka həbs verilib? Axı İnzibati Xətalar Məcəlləsinin 32-ci maddəsinə görə səmimi peşmançılıq inzibati xətanı yüngülləşdirən hal sayılır.
Bəs həbs olunanların adından nə səbəbdən apelyasiya şikayəti veriblər? Məqsədləri nədir? Axı özləri digərlərini apelyasiya şikayətindən, vəkildən imtina etdiriblər. Burda bir məqsəd var: qanunsuz əməllərini ört basdır etmək… Onsuz da vəkillərin prinsipiallığını bilirlər, onları “yola verməyin” mümkünsüzlüyünü anlayırlar. Vəkilin onsuz da apelyasiya şikayəti verəcəyini bilib (Vəkil ələ artıq şikayət verib) qabağa düşüblər. Bu məqsədlə işlərin avropa insan haqları məhkəməsinə çıxmasının qarşısını almağı düşünürlər.
Bu gün 12.08.2020-ci il tarixdə inzibati həbs olunanlardan ikisinin- Babək Muradov və Yaşar Kərimovun “özlərinin” verdiyi şikayətə baxılmalıdır. Vəkilin verdiyi apelyasiya şikayətindən isə hələ xəbər yox.
Azadlıq.info