Ənnağı Hacıbəyli
Son çağlar ölkədə baş verən hadisələrə dəqiq ad qoymaq asan deyil. Heç son illərin dünya düzəni də düzənə oxşamır. İraq intervensiyasından bu yana dünya bir addım irəli, iki addım geri gedir.
Bəzən adama elə gəlir ki, dünya ən yaxşı halda yerində sayır. Yoxsa, bu əsgi zehniyyəti, iyirmi birinci yüzillikdə orta əsr idarəçiliyini, insan haqlarına inkvizisaiya yanaşmasını başqa cür izah eləmək mümkün deyil.
Bəşər tarixi enişli-yoxuşlu yola bənzəyir. Tərəqqi-tənəzzül, sıçrasyış-durğunluq, humanizm-insana nifrət, demokratiya-avtoritarizm əvəzləmələri insan təfəkkürünə və iradəsinə kölgə salır. İnsanlıq bəşəri dəyərləri yaratmaqla sabaha yol açır, bu dəyərləri pozmaqla o yolu yolsuzluğa dirəyir, sonra özünü soxduğu dalandan çıxış yolları arayır. Görünür, bəşəri dəyərlərin ən axsaq cəhəti səmimiyyət çatışmazlığıdır. Bu sindrom insanlığın canı bahasına qazanılmış ən təhlükəli çatışmazlıqdır. Ona qarşı vaksin icad etməyə çalışan humanistlər, demokratlar, ümidsiz liberallar isə çox vaxt uğursuzluq zolağında ömürlərini başa vururlar.
Dünən də belə idi, bu gün də belədir. Bəs sabah necə olacaq? Deyəsən onu heç Tanrı da aydın təsəvvür eləmir. Amma Tanrı insanlığı milyon illərdir yaşadırsa, deməli, ümid işığı hələ sönməyib.
Ksenofonun “Sokrat haqqında xatirələrim” əsərini oxuyuram.
Rəqibləri Sokrata zaman-zaman böhtanlar atıb onu dövlətin gözündən salmağa, cəzalandırmağa çalışıblar və sonda ölümə məhkum edilməsinə nail olublar.
Ona atılan birinci böhtan: “Sokrat dövlətimizin tapındığı tanrıları danır, gəncləri pis yola çəkir”.
Orakulların – müqəddəs Delfi məbədinin kahinlərinin tanrılardan xəbər gətirməsini normal sayan hakimiyyət Sokrata – Tanrı ilə danışmağa daha çox haqqı olan fəlsəfə tanrısına bunu küfr sayırdı. Tanrıları aşağılayan bircə kəlmə belə deməmiş Sokratın “günahı” o idi ki, o, kütlədən fərqli düşünürdü, çünki onun yeri Tanrı ilə kütlənin arasında idi – Tanrıdan aşağıda, kütlədən isə çox yüksəkdə.
Məhkəmədə Sokratı ittiham edənlərdən biri deyir: “And olsun Zevsə, Sokrat dinləyicilərinə qanunlara sayğısızlıq öyrədir, deyir ki, dövlət qulluğuna adamları püşk atmaqla götürmək axmaqlıqdır, Sokrat oturuşmuş dövlət quruluşunu gənclərin gözündən salır, onları dövlət quruluşunu zorla yıxmağa yönəldir”.
Geyimində, davranışında, xərclərində nümunə sayılacaq adam dolanışığında ölçülü-biçili və əslində gənclərə örnək olub. Hətta bilik öyrətdiyi tələbələrindən pul da almazmış.
Sokrat deyirdi: “Birisi dövlətin başında ola-ola insanların dolanışığı günü-gündən pisləşirsə, onların sayı ildən-ilə azalırsa, ancaq bu adam utanıb-qızarmadan, ağızdolusu özünün yaxşı dövlət başçısı olduğunu deyirsə, bu gülüncdür”. Sokratı bu sözlərə görə gənclərlə – yaşı otuzadək olanlarla danışmaq hüququndan məhrum edirlər.
Toplumu guya Sokratın küfründən, indiki dillə desək, zərərli vərdişlərdən qorumağa çalışan dövlət özü topluma hansı dəyərləri aşılayır? Düşündüyünü dilə gətirməmək, zülmə dözmək, bir sözlə qanmamaq…
Afina dövlətinin başçısı Perikl Sokratın dönük şagirdi Alkiviadın sualına cavab olaraq demişdi: “Tiranın yurddaşlarının ürəyincə olmayan yazdıqları qanun sayıla bilməz”.
Bu, təkcə antik dövrə aid həqiqət deyil. Çağdaş, demokratik, dünyəvi dövlət iddiasında olanların hamısına aid olan əbədi və əzəli həqiqətdir. İnsanlığın tapınmalı olduğu həqiqət və dəyər. Yurddaşlarının ürəyincə olmayan, padşahın iştahını açan qanunlar yazanların isə tapındığı dəyərlər başqadır – tərəzidə çəkilən, korrupsiya büdcəsindən verilən ənamlar…
Sokratın qanunlara dəqiq əməl etmək kimi bir özəlliyi də var idi. Qanun və ya məmur göstərişləri ədalətsiz olanda bununla açıq mübahisə edir, lakin sonda onlara da əməl edirdi. Hətta ona gənclərlə danışmaq qadağan ediləndə bunu qanunsuz və ədalətsiz saysa da, bununla məhkəmədə cəsarətlə mübahisə etsə də, məhkəmə qərarını icra etmişdi.
Sokrat deyirdi ki, dövlətə başçılıq edənlərin ən yaxşısı yurddaşlarını qanunlara əməl etməyə yönəldə bilənlərdir. Bir dövlətin yurddaşları qanunlara dürüst əməl etmələri ilə sreçilirsə, o dövlət dinc çağlarında çiçəklənir, savaşda yenilməz olur. Yurddaşların hamılıqla anlaşdıqları dəyərlərə arxalanıb yaşaması dövləti gücləndirir. Dövlətin ədaləti kimləri cəzalandırıb kimləri mükafatlandırmasından aşq-aşkar görünür.
Yaltağı ödülləndirən, dəyərli vətəndaşını cəzalandıran dövlətlə vətəndaşları arasında heç vaxt anlaşma ola bilməz, belə dövlət çiçəklənə, savaşda düşmənə qalib gələ bilməz.
Siz bir dövlət olaraq qalib olmaq istəyirsinizmi?