Hüquq müdafiəçisi Rüfət Səfərov yazır:
Məhəllədə, orta və ali məktəbdə, hərbi xidmətdə qazanılan dostların özünəməxsus yerləri var.
Amma mübarizə yolunda qazandığın dostun yeri əvəzsizdir ki, onlardan biri, bəlkə də birincisi Nicat Abdullazadədir.
Nicat uğrunda savaş veridiyi ideyalara görə işindən-gücündən, maddiyyatdan, hüzurdan, rahat həyat tərzindən, ümumiyyətlə, çox şeydən məhrum olub.
Yaxından tanıyanlar təsdiqləyə bilərlər: onurğasında ciddi problemlər var, daim ürəyindəki ağrılardan şikayət edir, yüksək qan təzyiqindən əziyyət çəkir, amma bir gün də olsun, haqlı mübarizəsinə fasilə vermir, məsləyinə, məfkurəsinə, əqidəsinə, partiyasına, silahdaşlarına və liderinə cani-dildən bağlı olduğunu hər addımında hiss etdirir.
Gəlişigözəl söz deyil: Nicat azadlıq ideallarına bütün varlığını elə təslim edib ki, əlinin tərsi ilə kənara itələdiklərinə görə əsla peşmançılıq duymur, vətəndaş kimi məsuliyyətini hər zamam önə çəkir, xalq hakimiyyətiçün ciddi səylərini əsirgəmir, avtoriratrizmdən qurtulmaqdan ötrü hər cür fədakarlıq edir, usanmadan, yorulmadan, bezmədən az qala sutkanın 24 saatı yazır, danışır, paylaşır, ayrı-ayrı sosial şəbəkə və platformalarda haqsızlığa, ədalətsizliyə, vicdansızlığa, insafsızlığa qarşı sinəsini qabağa verir.
Bilirsiniz, 50 dən çox Azərbaycan sevdalısı saxta ittihamlarla ya inzibati, ya da cinayət məsuliyyətinə cəlb olunub, ağlasığmaz ittihamlara məruz qalıb ki, onlardan biri də Nicatdır- 30 sutka inzibati həbs tətbiq edilib.
Çox narahatıq.
Hakimiyyətin əlində repressiv cəza aparatına çevrilən hüquq mühafizə orqanları həbsdə də Nicatı rahat buraxmırlar. Saxlanıldığı DİN-nin İnzibati qaydada həbs olunanların saxlanılma məntəqəsindən ibtidai istintaq orqanalrına aparıb, saatlarla dindirirlər, partiyadaşlarının əleyhinə “etirafedici” ifadələrə imza atmasını tələb edirlər. Əks təqdirdə cinayət məsuliyyətinə cəlb edəcəkləri, xüsusilə ağır cinayətdə- hakimiyyəti zorla ələ keçirmə və ya onu zorla saxlama, dövlətin konstitusiya quruluşunu zorla dəyişdirmədə, Fuad Qəhrəmanlı və Məmməd İbrahimlə “əlbirlikdə” ittiham edəcəkləri ilə təhdid edirlər.
14-15 iyulda keçirilən Qarabağ yürüşündə bu və ya digər formada iştirak etməyən, lakin bundan 3 gün sonra yaşadığı mənzildən oğurlanan, epidemiya əleyhinə rejimin, sanitariya-gigiyena və karantin rejimlərinin pozulmasında ittiham olunaraq 30 sutka inzibati həbsə məruz qalan Nicat Abdullazdənin 10 gündən sonra azadlığa buraxılmaması mümkündür.
Barəsində əsassız cinayət işinin başlanılması üçün hazırlıqların getdiyinə dair narahatedici xəbərlər daxil olur.
Məsuliyyətli vətəndaşıqsa, bu və buna bənzər hallara laqeyd qalmayaq.