Türkel Oğuz
Ceyhun Bayramovla Hikmət Hacıyevin birgə mətbuat konfransından anlaşılanlar:
- Atəşkəsin müddəti bəlli deyil. Bir tərəfdən humanitar atəşkəs olduğunu deyib müddətini Beynəlxalq Qırmızı Xaç Komitəsinin müəyyənləşdirəcəyini bildirdilər, digər tərəfdən isə Ermənistana siyasi qərarların qəbul edilməsi üçün verilən uzunmüddətli fürsət kimi dəyərləndirdilər. Ancaq onu da qeyd etdilər ki, Ermənistan artıq atəşkəsi pozur.
- İlham Əliyevin şərt olaraq irəli sürdüyü işğalçı qoşunların torpaqlarımızdan çıxması ilə bağlı heç bir razılaşma, vaxt cədvəli, hətta niyyət yoxdur. Yəni, ermənilər bir addım da geri çəkilməyib.
- Danışıqların formatı dəyişmir və öncədən Hikmət Hacıyevin bəyan etməsinə baxmayaraq Türkiyə o formatda olmayacaq, ancaq Fransa həmsədr olaraq danışıqlar masasında qalmaqdadır.
- Ceyhun Bayramov bildirdi ki, erməni həmkarının aqressiv bəyanatları bundan sonra daha çox olacaq və onları ciddiyə almaq lazım deyil, çünki daxili auditoriyaya hesablanıb. Belə çıxır ki, Ermənistan rəsmiləri daxili auditoriyanın qorxusundan yalançı aqressiv bəyanatlar verməkdə davam edəcəklər, ancaq həmin auditoriyadan qorxmadan işğal etdikləri torpaqlarımızdan gerçəkdə könüllü çıxacaqlar. Məntiq haradadır?!
- Ermənistanın bir il öncəki status-kvoya, yəni, baza prinsiplərinə qayıtması böyük uğur kimi dəyərləndirildi. Əslində, Paşinyan status-kvodan çox uzaqlaşmamışdı, Köçəryan və Sarkisyandan fərqli olaraq torpaq işğal etməmişdi. Sadəcə, Paşinyan Qarabağ keçmişinin olmamasından qaynaqlanan komplekslərindən dolayı özünü aqressiv aparıb bir-iki axmaq bəyanat vermişdi, Şuşada inauqurasiya təşkil etmişdi.
- Baza prinsiplərini sadalayan nazirimiz öncə 5, sonra 2 rayonun boşaldılması, ardınca məcburi köçkünlərin öz evlərinə qayıtması şərtlərini göstərsə də, nədənsə yekunda ermənilərin referendum yolu ilə öz müqəddəratını həll etməsi kimi taleyüklü tələbi qeyd etməyi unutdu. Əslində, Madrid tənzimlənməsi çərçivəsində irəli sürülmüş baza prinsipləri Qarabağın referendum yolu ilə, yəni, legitim əsasla itirilməsinə aparan yoldur.
Yəni, mətbuat konfransından bircə o məlum oldu ki, heç nə məlum deyil ( o cümlədən Ceyhun Bayramovla Hikmət Hacıyevə də) və demək olar ki, heç nə dəyişməyib.