Qənimət Zahid
Azərbaycan yeni hərbi və siyasi fazaya daxil olur. Bir sıra özəllikləri mütləq nəzərə almalıyıq.
- Panika olmamalıdır və ruhdan düşmək heç olmamalıdır. Müharibə dövrünün sosial psixologiyasını qəbul etməliyik. Düşmən məkrlidir, amma biz də cəsur olmalıyıq. Olduğumuz hər yerdə cəsur olmalıyıq ;
- İndiki müharibələr Kalaşnikovların hürüşməsi deyil, uzaq mənzilli silahların bağırtısıdır və bu səslərə öyrənməliyik, onların gətirə biləcəyi xofu da rədd etməyi bacarmalıyıq ;
- Azərbaycan həm daxildən, həm xaricdən informasiya blokadasındadır. Bu blokadanı yarmağı bacarmalıyıq. Ən qısa müddətdə bunu edə bilərik və etməliyik. Ölkənin daxilində və xaricində etibarlı sayılan informasiya qaynaqlarını dərhal bərpa etməliyik. Bu müharibə İlham Əlievlə Paşinyanın arasında deyil, Azərbaycan xalqının ərazi bütövlüyü uğrunda savaşıdır. Bu gerçəyi dünyaya inamlı şəkildə qəbul etdirmək üçün hökumət informasiya siyasətinə dərhal dəyişiklik etməlidir. İndi əhali arasında panikanı, daha çox, informasiyasızlıq dərinləşdirə bilər və buna yol vermək olmaz. Hökumət daxili informasiya blokadasını aradan qaldırmaqla yerli KİV-lərin xarici informasiya blokadasını aradan qaldıracağına əmin olsun.
- Hökumət nəzərə almalıdır ki, özününkü saymadığı siyasi baxışlar da indi Azərbaycanın təbii haqları uğrunda savaşa dikilib. Hamı vətənpərvərdir. Hökumət dərhal daxili siyasi düşmənçilik pərdəsini gözlərindən atmalı, məhz, bu ərəfədə Azərbaycanın yeni imicini dünyaya təqdim etməyi bacarmalıdır.
- Bu hərbi- siyasi kampaniyanın məsuliyyəti bir nəfərin üzərində təsəvvür edildikcə onun nəticələrinə heç bir uğur zəmanəti yoxdur. Xalq müharibəsi xalqın məsuliyyətidir. Xalqın bu məsuliyyət haqqını qəbul etmək lazımdır. Hakimiyyət məsələsi indi bir sual olaraq ortalıqda deyil. Bunu anlamaq gərəkdir.
(şəkildə : Gəncəyə raket atəşindən bir epizod)