Eyvaz Taha
Müharəbənin ilkin günlərindəki iztirabım, həyrətim, çaşqınlığım artıq keçib gedib. Böyük güclərin oyunlarının pozulduğuna sevinirəm. İndi savaşın hansı şiddətlə haralarda cərəyan etdiyini bilirəm. İndi bilirəm Azərbaycan ordusu hansı yüksəklikləri ələ keçirib, hansı yolları nzarət altına alıb. İndi bu sualın cavabını tam dəqiq olmasa da qismən bilirəm: ordu niyə Ağdərə və Ağdamdan yan keçib Zəngilan və Qubadlını azad etdi. İndi bilirəm PUA-lar ermənistan əsgərləri və hərbi sursatıni nə günə saldılar.
Bütün bu bilgilərə rəğmən, üç gündür hər bir şayiə məni sevindirir. Şuşanın düşmən caynağından qurtarılması barədə her bir yalan xəbərə bələ inanmaq istəyirəm. Gecə saat ikidə prezidentin tvit atmayacağını bilirəm. Lakin yənə də onun hesabına dəfələrlə baş çəkirəm.
Şuşa təkcə hansısa coğrafiyanın adı deyil, bir mədəniyyət ocağıdır; Musiqi mərkəzi, qısqanılacaq ədəbi dərnəklərin beşiyi, bəlli memarlıq məktəbinin simgəsi, tarixin bir parçası, əzəli xatirələrin canlı abidəsi, Pənahəli xan, İbrahimxəlil xan, Mehdiquluxanın mirası, Xorşidbanu Natəvanın diyarı, Molla Pənah Vaqifin məzarı və əlbəttə Erməni Daşnaklarının cinayəti nəticəsində öz yurd-yuvalarından sürgün düşmüş insanların vətəni.
Şuşanın qurtaılması ilə Ortaşərqin coğrafiyası da dəyişəcək, gələcək taleyi də.