Milli Şuranın sədri Cəmil Həsənli
İki gün əvvəl İbrahimin təhsildən kənarda qoyulması haqqında yazmışdım. Bu məsələ ilə bağlı son iki gün ərzində Azərbaycandan və dünyanın müxtəlif yerlərindən çoxlu zənglər, məktublar almışam. Adamlar ölkənin Təhsil Nazirliyinin 16 yaşlı bir yeniyetmənin müxtəlif bürokratik əngəllərlə məktəbdən kənarda qoyulmasına heyrət edirlər. Mənim ictimai-siyasi mövqeyimə görə 16 yaşlı bir uşağı cəzalandırırlar. Təhsil öz özlüyündə humanitar bir prosesdir. Bu sahəyə məsul olan bir dövlət qurumu bunu necə edə bilər? Hətta, Stalin dövründə “xalq düşməni” kimi güllələnən adamların uşaqların belə təhsildən kənarda qoymurdular.
Mən bir daha təkrar edirəm: niyə orta məktəblərdə şagirdlərin obyektiv və subyektiv səbəblərdən oxuduqları məktəbləri dəyişməsi, müvəqqəti xarici təhsilə cəlb olunmuş uşaqların öz məktəblərində təhsillərini davam etdirilməsi kimi məsələlərlə Təhsil Nazirliyi məşğul olmalıdır. Axı, belə xırda məsələlər Rusiya ali məktəblərinin Dağıstan filiallarından Azərbaycan universitetlərinə testdən kənar tələbə köçürmələri deyil.
İbrahimlə bağlı bu narahatçılığı bölüşən dostlar nə baş verdiyini soruşurlar. Dünən Təhsil Nazirliyindən 132 saylı məktəbə zəng vurub İbrahimlə bağlı məlumatlar alıblar. Eyni məlumatları Nazirlik sentyabr ayında da məktəbdən almışdı. Araşdırmanın nəticələrinə görə bizə məktub göndərildiyi bildirilsə də, 45 gündür məktub ünvanına yetişmir. Doğrusu artıq belə bir məktubun sentyabr ayının 23-də göndərildiyi də inandırıcı görünmür. Çünkü Nazirlik məsələni yenidən araşdırır. Yəqin ki, bu araşdırmadan sonra nəyinsə “düz olmadığı” barədə hansısa bəhanə uyduracaqla.
Bir qayda olaraq 9-cü sinifi bitirəndən sonra təhsilini davam etdirmək istəməyən şagirdlər şəhadətnamələrini məktəbdən alırlar. İbrahimin isə şəhadətnaməsi və şəxsi isi oxuduğu məktəbdədir. Ötən dərs ilində ABŞ-ın Merilend ştatında “Northwood High School”-da oxuduğu dərs ilinin sənədləri və təhsil göstəriciləri də 2 ay əvvəl nazirliyə təqdim edilib. Görün Təhsil Nazirliyində bürokratiya, şagirdin taleyinə biganəlik və ya valideynin siyasi baxışlarına görə məktəblini cəzalandırmaq cəhdi hansı səviyyədədir?
Nəvəm olduğuna görə demirəm. İbrahim çox istedadlı, tərbiyəli, qabiliyyətli bir uşaqdır. Dərslərini yaxşı oxumaqla yanaşı gözəl əl qabiliyyəti var. Çəkdiyi tablolar dəfələrlə İçəri Şəhərdəki sərgilərdə, hətta Xalq Rəssamı Tahir Salahovun evində təşkil edilmiş sərgidə nümayiş etdirilib. Bu istedadına görə “Northwood High School”-da müəllimlər ona xüsusi qayğı ilə yanaşırdılar. Aşağıda onun ir neçə tablosunu qoyuram. Bir neçə il əvvəl Van Qoqun avtoportretini işləmişdi. Xalasının portretini də maraqlı işləyib. Bu avtomobili çəkməsindən mən elə də razı deyildim. Amma çoxları elə bilir ki, bu tablo yox, fotodur. Yaxşı payız mənzərələri işləyib İbrahim. Həmin işlərin bəziləri indi xarici ölkələrdədir. Nə isə, mənə görə uşağın təhsildən kənarda qoyulması heç anlaşılan deyil.