AXCP Rəyasət Heyətinin üzvü Fuad Qəhrəmanlı
Navalnı həbsdə olmasına baxmayaraq, Putin üzərində siyasi psixoloji – üstünlük qazanmağa nail oldu. Siyasətdə də başlıca olan budur. Əgər, azadlıqda və ya həbsdə, mühacirətdə ya Vətəndə olmağından asılı olmayaraq, ictimai rəydə üstünlük qazana bilirsənsə, bu uğurun əsasdır. Navalnı son ifşa faktları ilə dünənə qədər onunla mübarizə aparan Putini ölkə ictimai rəyi ilə üz – üzə qoyaraq, onun vətənpərvərlik şüarlarını dəyərsizləşdirərərk korrupsioner obrazını yaratmağa nail oldu . Bu hakimiyyətin ideoloji əsaslarının sarsılması deməkdir. Hakimiyyətin ixtiyarında olan nəhəng informasiya resursları, bu təbliğat rəqabətində uduzaraq, Putini ittihamlardan və ictimai qınaq hədəfi olmaqdan qoruya bilmədilər.
Digər tərəfdən də, ölkə daxili ilə yanaşı, beynəlxalq səviyyədə Putinə qarşı açılmış ikinci cəbhədə də mühasirə halqası get – gedə daralmaqdadır. Bilindiyi kimi, Putinin böyük ümidlər bəslədiyi “Şimal Axını – 2” layihəsi sanksiyaya məruz qalıb.
Putin hələ ki, itkilər verir.
Sabah isə Navalnının azadlığı tələbi ilə mitinqlər gözlənilir. Hakimiyyət bu aksiyalara qarşı planlaşdırdığı zorakılığa gedəcəksə, böyük ehtimalla gedəcək, o zaman Putinə qarşı xarici təzyiqlər daha da artacaq. Daxildə isə siyasi qütbləşmə dərinləşəcək, cəmiyyətlə hakimiyyət arasında qarşıdurma kəskinləşəcək.
Bir sözlə, qarşıda Putin hakimiyyətini avtoritarizmi sarsan çətin proseslər gözləyir. Sentyabra qədər Duma seçkilərinin olacağını da nəzərə alsaq, cəmiyyətdə siyasi aktivliyin daha da artacağını gözləmək olar. Belə bir əlverişsiz şəraitdə lkeçiriləcək seçkilər, hakimiyyətə qarşı daha böyük və kütləvi etiraz dalğasının yaranması üçün katalizator ola bilər.