Milli Şuranın sədri Cəmil Həsənli
Cəbhəçi fəal Niyaməddin Əhmədovun başına gətirilənlər hüquq adına rəzalət, dövlət adına utancdır. Niyaməddin yaxşı tanıdığım vətənsevər, nəcib, əxlaqlı, doğru-dürüst bir gəncdir. Onunla bağlı baş verənlər cəngəllək qaydaların, heyvanla aləmindən bəhs edən nağıl və lətifələrdəki cəngəllik “hüququn” xatırladır. Deyir bir gün meşədə dövşan hövlənak qaçırmış. Tülkü ondan soruşur niyə belə həyəcanla qaçırsan, hara tələsirsən? Dövşan deyir ki, təzə başçımız göstəriş verib ki, kimin 3 qulağı var kəsin gətirin. Tülkü gülür ki, sənin ki, iki qulağın var, sən niyə qorxursan? Dövşan cavab verir ki, təzə əmrə görə əvvəl kəsib sonra sayırlar. Amma heç olmasa o meşə “hüququna” görə heç kəsə fərq qoymadan kimin “üç qulağı” varsa kəsirdilər. Bizim hüquq sistemimiz cəngəllik “hüququndan” da irəli gedib və indi bu yanaşma Azərbaycan hüquq sistemi üçün adi iş metoduna çevrilib.
Niyaməddin Əhmədovu ötən ilin aprelində əvvəlcə virus erasında gündəlik tətbiq edilən cəbhəçi ittihamı – karantin qaydalarını pozma və ənənvə müxalifət maddəsi – polisə tabe olmamaq ittihamı ilə 30 sutka həbs etdilər. Aprelin sonunda onu DİN-in müvəqqəti saxlama yerindən bəlli olmayan bir yerə aparıb ona amansız işgəncə vermişdilər. Bu işgəncə nəticəsində Niyaməddinin böyrəklərindən qan sızmağa, kəmikləri sızıldamağa başlamışdı. Vəkillə, ailə üzvləri ilə görüş və telefon əlaqəsinə içazə vermirdilər. Azərbaycan hakimiyyəti öz natəmiz vicudun Qərbdə təmizə çıxarmaq üçün erməni əsirlərinə Yerevanla telefon və sosial kommunikasiya şəraiti yaratdığını nümayiş etdirdiyi halda erməni işğalçılarına qarşı vətənin müdafiəsində iştirak etmiş Niyaməddin 8 ay qanunla təsbit edilən bu elementar hüquqlarından məhrum edilmişdi. Bəli qanunsuz olaraq həbs edildiyi 8 ay ərzində Niyaməddin Əhmədovun ailə üzvləri ilə telefonla danışmasına icazə verməyiblər.
Niyə Niyaməddinə amansız işgəncələr verilir, niyə o, Əliyevin işgəncə labaratoriyalarından keçirilir, niyə onun bədəni modul tipli elektrik cərəyanının təcrübə sahəsinə çevrilmişdi? XXI əsrdə bizim “müasir” hüquq sisteminin bütün bu “sübut toplama” metodları Niyaməddinin üzərində sınaqdan keçirilmişdi. Məqsəd adamın etmədiyi əməli onun üzərinə qoymaq, törətmədiyi cinayəti etiraf etdirmək, özünə qarşı böhtana işgəncə yolu ilə məcbur etmək, onu ssenariləşdirmiş cinayət dedektivinin baş roluna çəkmək. İndi siz deyin: kimdir cinayətkar? Gündəlik həyat və dolanışıq qayğıları ilə yaşayan məsum bir gənc, yoxsa saxta terroru maliyələşdirmək ittihamını işgəncə yolu ilə ona etiraf etdirmək istəyən hüquq mühafizə orqanları, qanunun keşiyində dayanan prokurorluq və ya həqiqəti üzə çıxarmalı olan istintaq orqanları?
Əlbəttə bu terrorun maliyyələşdirilməsi tək Niyaməddin Əhmədova qarşı irəli sürülün ittiham deyildi, həm də elə Niyaməddin həbs edilən vaxtdan kommunikasiya blokadasına alınmış, evinin qarşısında nəzarət postu qoyulmuş, bütün telefon və internet əlaqələrindən məhrum edilmiş, Əliyevin təbirincə desək dialoqdan boyun qaçırmaqla “vətənə xəyanət” etmiş Xalq Cəbhəsi sədri Əli Kərimliyə qarşı irəli sürülmüşdü. Niyaməddinə verilən amansız işgəncə şübhəsiz ki, terrorizmin maliyə zəncirin nəticə etibarı ilə Əli Kərimlinin qollarına bağlamalı idi. Bütün oyun da bunun üzərində qurulmuşdu.
İndi artıq üç, ya dördüncü dəfədir Niyaməddinin ittihamın dəyişirlər. Yeni ittihama görə guya o, mülki dövriyyədən çıxarılmış əşyaların qanunsuz olaraq hazırlanması, əldə edilməsi, saxlanılması, daşınması, gəzdirilməsi və başqa şəxsə verilməsi və ya satılmasında şübhəli bilinir, habelə dövlət əleyhinə yönələn açıq çağırışlar etməkdə günahlandırılır. Gülməlidir vallah! Karantin qaydasın pozmaq hara, polisə tabe olmamaq hara, terrorun maliyələşdirilməsi hara, dövrüyyədən çıxarılmış əşyaların hazırlanması və satılması hara? Görünür Niyaməddin dövriyədən çıxarılmış əşyaları hazırlayıb satmaqla terroru maliyələşdirmək üçün pul toplayırmış. Nə deyəsən? Ölkənin hüquq sistemin belə gülünc bir vəziyyətə salıblar.
Amma iş dağıldı. Ona görə dağıldı ki, ölkənin hüquq orqanları hüquqdan daha çox dərziliklə, günahsız vətəndaşa torba tikməklə məşğuldurlar. Tikdikləri torbalar da “kitayski” xurcun kimi keyfiyyətsiz olduğu üçün tez bir zamanda sökülüb dağılır, ilməsi qaçır və torbadan pişik çıxır. Çünki bunların çoxu torba yox, xidməti istifadə üçün palan tikəsi adamlardır. Əgər adamdırlarsa?