1990-cı il yanvarın ilk günlərindən xaricilərin Bakıya girişi qadağan edilmiş və bu qadağa həmin ilin noyabrına qədər qüvvədə qalmışdır.
1990-ci ilin dekabrında Human Rights Watch (o zaman adı Helsinki Watch idi) və SSRİ-də mərkəzləşən Respublikalararası Memorial Cəmiyyət (Inter-republic Memorial Society – 1989-90-cı illərdə yaradılmışdı) həmin ilin yanvarında və ondan sonrakı müddətdə Bakıda baş verən mümkün insan hüquqları pozuntularını araşdırmaq məqsədilə paytaxta bir komanda göndərmişdilər. Detallarına girmədən komandanın gəldiyi başlıca nəticələri nəzərdən keçirək:
- Sovet qoşunları əsassız (unjustified) və aşırı (excessive) gücdən istifadə etmişdilər ki, bu da qeyri-zəruri (unnecessary) mülki itkilərə, o cümlədən çox sayda ölümə səbəb olub.
- Sovet qoşunları asayişi bərpa etmək üçün ölümcül olmayan tədbirləri görəcək və ya polis funksiyasını yerinə yetirəcək qədər yaxşı təlimə və ləvazimatlara sahib deyildi.
- Fövqəladə vəziyyətin tətbiqi vətəndaş azadlıqlarının, xüsusilə də hərəkət və ifadə azadlığının əsassız/özbaşına (unwarranted) boğulması/pozulması (infringement) ilə nəticələndi; və
- Bakıda fövqəladə vəziyyətin bu vaxta qədər davam etdirilməsi və bunun nəticəsində meydana gələn vətəndaş azadlıqlarının pozulması əsassızdır.
Komanda özünün ən diqqətçəkici (striking) gördüyü şey olaraq Sovet ordusunun həmin gecə Bakıya sanki hərbi fəlakətə yol açmağa çalışan bir düşmənin üzərinə hücum edərcəsinə soxulmasını göstərir. Hesabatda bildirilir ki, Sovet ordusunun qınanmalı hərəkətlərinə bunları da daxil etmək lazımdır:
Əsgərlər:
1. Yaralılara kömək etməyə çalışan və üzərində aydın işarələri olan təcili yardım maşınlarına atəş açmış, ən azı bir həkimi öldürmüşlər.
2. Sovet əsgərlərinə qarşı heç bir ciddi təhlükə törətməyən mülki avtobusa hücum edərək onun sürücüsünü və bir sərnişini qətlə yetirmişlər.
3. Məqsədli şəkildə mülki sakinləri əzmək üçün zirehli vasitələrdən istifadə etmişlər. Bununla bağlı ən azı bir dənə sənədləşdirilmiş hadisə qeydə alınıb.
4. Tamamilə təsadüfi olaraq seçilən maşınları, yaşayış binalarını və həyətləri atəşə tutmaq üçün az qala iki mütəşəkkil ordu arasında baş verən genişmiqyaslı döyüşlərə uyğun avtomat silahlardan istifadə ediblər,
5. Mülki sakinlərə qarşı süngülərdən istifadə etmişlər.
6. Həbsə atılmış günahsız mülki şəxslərə qarşı fiziki və psixoloji zorakılıq törətmişlər ki, bunun da nəticəsində azı bir nəfər boğularaq həyatını itirmişdir.