Türkel Oğuz
SOCAR Azərbaycan neft və qaz təsərrüfatının böyük hissəsini idarə edən dövlət şirkətidir. Ölkəyə yüz milyardlarla gəlir gətirməlidir, ancaq nəinki gəliri yoxdur, hətta bu günə olan rəsmi borcu 10 milyard manatdan artıqdır. Çünki SOCAR çıxardığı nefti və qazı satır, qazandığı on milyardlarla vəsaiti xarici offşor hesablara köçürür. Pulun az bir hissəsinə))) SOCAR rəhbərliyi 3-4 milyonluq saatlar, 300-500 minlik avtomobillər, Türkiyədə, Dubayda, Avropa ölkələrində əmlak alır, Bakıda təkcə hamamının qiyməti bir neçə milyon manatla ölçülən villalar tikdirir.
SOCAR-ın ilan kimi qıvrılan yeni binası elə Azərbaycan xalqının həyatını zəhərə döndərməklə tikilib. Bu binanın tikintisinə 200 manat pensiya, 250 manat əmək haqqı alan, əksəriyyəti işsiz olub heç onu da almayan dözümlü xalqımız 704 milyon manat vəsait ödəyib. Binanın bir kvadrat metri dövlətin 100 manat uşaqpulu, karantin zamanı 190 manat yardım qıymadığı Azərbaycan vətəndaşına düz 17 min 377 manata başa gəlib.
Siz dünyada ikinci elə bir xalq tanıyırsınızmı ki, 70 faizi işsiz olsun, işləyəni 250-350 manat maaş alsın, tibbi sığortası olmasın, ancaq sahib olduğu zəngin neft sərvətini bir tüfeyli dövlət şirkətinə peşkəş etsin ki, yüz milyardları yeyin, dağıdın, öz halal haqqımızdan bizə heç nə verməyin, üstəlik 10 milyard borc alıb belimizə yükləyin ki, balalarımız və nəvələrimiz də ömürlərini bizim kimi sürünərək həmin acgöz quldurların 50 milyonluq villalarının, 3 milyonluq saatlarının, 20 minlik şərablarının pulunu ödəməyə xərcləsinlər.
Səmimi etiraf edim ki, mən tanımıram.