Türkel Oğuz
Biz “Şuşakənd ermənilərin nəzarətinə verildi, Şuşa yolsuz qaldı” deyəndə adlı və adsız trollar bizi təhqir edirdi.
Biz “Şuşa üzük qaşı kimi mühasirəyə alınıb” deyə həyəcan təbili çalanda təxribatçı adlandırıldıq.
Biz “Laçın dəhlizi tam olaraq ermənilərin istifadəsindədirsə, heç olmasa Qırmızı Bazardan Şuşaya yol verilsin” tələbini səsləndirəndə “uğurlarımızı gözü götürməmək”-də suçlandıq.
Buyurun, bu da nəticəsi.
İndi bəlli olur ki, İlham Əliyev Şuşaya gedə bilmək üçün ermənilərdən razılıq almalı olub və bu razılığın qarşılığında hərbçilərimizin əsir götürdüyü 62 erməni terrorçusundan 5-i Irəvana qaytarılıb.
İndi təsdiq olunur ki, ermənilərin razılığı olmadan hətta prezident də Şuşaya gedə bilməz. Bəs sıravi Azərbaycan vətəndaşları necə gedəcək?! Azərbaycanlılar Şuşaya necə qayıdacaq?!
Azərbaycan tərəfi, hətta Azərbaycan prezidenti Qarabağda ermənilərin icazəsi olmadan hərəkət edə bilmir. Bu və ya başqa məsələləri razılaşdırıb icazə almaq üçün isə separatçı rejimin cinayətkar rəhbərlərilə intensiv danışıqlar aparılır.
Erməni mənbələri bu danışıqlarda Azərbaycan tərəfdən yüksək vəzifəli şəxslərin iştirak etdiyini iddia edir. Sosial şəbəkələrdə isə bu şəxsin DTX rəisi Əli Nağıyev olduğu bildirilir.
Azərbaycan Baş Prokurorluğu tərəfindən Gəncə və Bərdə qətliamlarına görə barəsində cinayət işi açılan, guya Interpol vasitəsilə beynəlxalq axtarışa verilən uşaq qatili, terrorçu Araik Harutyunyanı Rusiya Pisməramlılarından tələb edib həbs etmək əvəzinə onunla yüksək səviyyədə danışıqlar aparmaq Azərbaycanın milli və dövlət maraqlarına xəyanətdir, 3 min şəhidimizin ruhuna təhqirdir, Azərbaycan xalqının Vətən sevgisinə həqarətdir.
Azərbaycan hakimiyyəti təcili qaydada bu məsələyə aydınlıq gətirməlidir. Əks halda, erməni mənbələrinin yaydığı məlumatın gerçəkliyini etiraf etmiş olacaqlar.