AXCP sədri Əli Kərimli
Taleyin istehzasına baxın. Oğru hakimiyyət onun oğru olduğunu deyən müxalifətçinin evini əlindən aldığı günlərdə özünün daha bir oğurluğu ifşa olundu. Bilirsiniz ki, hakimiyyətin tapşırığı ilə sifarişli məhkəmə Milli Şura Koordinasiya Mərkəzinin üzvü Gültəkin Hacıbəylini qondarma bəhanəylə 85 min manat cərimələyib. Bu bəhanə ilə Gültəkin xanımın həm evinin, həm də maşının üzərinə həbs qoyulub. Bu günlərdə isə xəbərdarlıq ediblər ki, Gültəkin xanımın evini satışa çıxarıb, əlindən alacaqlar.
Rejim Gültəkin xanımın evini əlindən almağa hazırlaşdığı günlərdə isə özünün daha bir nəhəng oğurluğu ifşa olundu. Məlum oldu ki, hakim qruplaşma təkcə Gənclikdəki tunelin tikintisinə vaxtilə 512 milyon dollar pul silibmiş. Hüquqdan, demokratiyadan azacıq əsər-əlamət olan ölkədə belə bir nəhəng oğurluğu ifşa olunan hakimiyyət dərhal istefaya gedərdi. Azərbaycanda isə cəzasızlıq mühitində meydan sulayan korrupsionerlər utanmaq, istefa vermək əvəzinə onlara oğru deyənləri cəzalandırır.
Şübhə yoxdur ki, rejim Gültəkin Hacıbəylini prinspial müxalifətçi mövqeyinə, ölkənin, xalqın problemlərini açıq şəkildə dilə gətirdiyinə, ölkədəki korrupsiya şəbəkəsini ifşa etdiyinə görə cəzalandırır. Bu təzyiq də Milli Şuraya qarşı çoxsaylı təzyiqlərin növbəti həlqəsidir.
Unutmayaq, məhz əksəriyyətimizin ölkədə baş verənlərə susqunluğu rejimə cəsarət verir ki, bu qədər haqsızlıq etsin. Xalq olaraq bu barbarlığa susmayaq ki, sabah da xalqımızın sözünü deyib, haqqını müdafiə edən siyasətçi və ziyalılar olsun.