Milli Şuranın sədri Cəmil Həsənli
Əgər böyük Rəsulzadənin portretini çəkdiyinə görə tanınmış miniatürçü rəssam Pəri xanım Atatürk lisesindəki müəllim vəzifəsindən azad edilirsə, onda daha bu lese Atatürk yox, Heydər Əliyev lisesidir və zəhmət çəkib mahiyyətinə uyğun adı ilə fəaliyyət göstərsin. Böyük Atatürkün adını öz natəmiz əməllərinə pərdə etməsinlər. Leseyin təsviri incəsənət müəllimi Pəri Miniatür kimi istedadlı bir sənət adamını azad düşüncəyə, yaradıcılıq mövzu və seçiminə görə işdən çıxarılması sözün tam mənasında rəzalətdir. Bakı Atatürk liseyi bu rəzalətə yol verməklə liseyin quruçusu, türk dünyasının böyük hocalarından biri kimi Prof. Turan Yazqanın adına və işıqlı əməllərinə də kölgə salıb.
Belə rəzalətlər necə baş verir? İndi mən Sizlərə izah edim. Bir dəfə bir rektor mənə danışdı ki, həmin dövrdə prezidentin icra aparatının rəhbəri Ramiz Mehdiyev ona zəng edib soruşub ki, Tofiq Yaqublunun qızı Nigar Yaqublu Sizin universitetdə oxuyur? Rektor da deyib bəli bizim universitetdə oxuyur. Mehdiyev göstəriş verib ki, siyasi aksiyalarda o, çox aktivlik edir, onu qovun universitedən. Çətin olsa da rektor izah etməyə çalışıb ki, Ramiz müəllim Nigar Yaqublunu necə qovaq? Bura özəl universitetdir, Nigar Yaqublu təhsil haqqın ödəyib, müntəzəm olaraq dərsə gəlir, imtahanları yaxşı qiymətlərlə verib, ictimai işlərdə fəal və intizamlı bir tələbədir. Bundan əsəbləşən Ramiz Mehdiyev deyib ki, yaxşı əgər Siz Nigar Yaqublunu universitetdən qovmursunuzsa onda biz özümüz onun haqqında tədbir görərik. Və bildiyiniz kimi gördülər də.
Çoxları sadəlövhcəsinə islahatdan-zaddan danışır, Qərbdə təhsil almış yeni kadrların irəli çəkilməsindən, ölkədə “dəyişiklik” erasının başlamasından dəm vurur. Bugün Pəri Miniatürün Atatürk lisesindəki müəllim vəzifəsindən uzaqlaşdırılması İlham Əliyev rejimin Ramiz Mehdiyevsiz də öz mahiyyətində, öz ampulasında qaldığının ibrətamiz bir örnəyidir. Heç nə dəyişməyib, sistem dəyişməsə, dəyişməyəcək də. Namuslu adamların təqib edilməsi, namussuz rejimlərin gələnəksəl iş metodur. Ayrı çür ola bilməz.