Milli Şuranın sədri, professor Cəmil Həsənli
Vladimir Putin müxalifətin bu həftəyə təyin etdiyi mitinqinin kütləviliyini önləmək üçün geniş sosial güzəştlərə, xüsusiylə uşaq pulu məsələsində radikal güzəştlərə getdi. Bugün Rusiya prezidenti Dövlət Dumasına müraciətində uşaqların sosial təminatı ilə bağlı geniş proqram elan edib. Təsəvvür edirsinizmi 1-ci uşaqdan başlayaraq analıq kapitalının həcmi 640 min rubla (8500 ABŞ dolları) çatdırıldı. Yəni uşaq dünyaya gətirən hər bir ailə hər bir doğulan uşaq üçün 640 min rubl ala biləcək. Bu hələ hamısı deyil.
Pandemiya ilə bağlı hər bir uşağa son iki ildə ödənilən 10 min rubl sosial yardım bu ilin avqustunda istisnasız olaraq bütün məktəb yaşlı uşaqlara yenidən ödəniləcək. Bu da hələ hamısı deyil. Tək valideyin yanında böyüyən 8-16 yaş arasında olan uşaqlara bu ilin iyul ayının 1-dən etibaraən hər ay 6550 rubl müavinət ödəniləcək. Yeni müraciətə görə nəinki 16 yaşına qədər uşaqlar, hətta dünyaya gəlməyə hazırlaşan uşaqlar da sosial yardımla əhatə edilib. Rusiya prezidenti Dumaya müraciət edib ki, çiddi maddi çətinlik içində olan analara erkən hamiləlik dövründə 6350 rubl aylıq ödəniş veriləcək. 7 yaşına qədər xəstələnən uşaqlara baxan anaların əmək haqqı bundan sonra 100 faiz ödəniləcək. Yaşayış minimumundan aşağı gəliri olan ailələrə indiyə qədər 1-ci və 2-ci uşaqlar üçün 3-7 yaş arası ödənilən 5650 rubldan 11300 rubl arasında aylıq yardım proqramı bundan sonra yoxsuluq təhlükəsini aradan qaldırmaq məqsədiylə hökumətə tapşırılb ki, iyulun 1-nə qədər vahid dəstək proqramı hazırlasın, yəni ödənişlər yuxarı həddlə müəyyənləşdirilsin. Söhbət Rusiyada 28 milyon uşağı əhatə edən sosial güzəştlərdən, birbaşa uşaqpulundan, uşaqlı ailələrin sosial müdafiəsini artırmaqdan gedir.
İndi gördünüz ki, hökumət uşaqlara pul vermək istəyəndə ilin ortasında da vəsait tapa bilir. Bizim “nəzəriyyəçilərin” büdcənin qoruyucu “mələyinə” çevrilməsi, “konsepsiya və mexanizm” adı altında spekulyasiya etmələri İlham Əliyevin dialoq və konfiqurasiya oyunbazlığının “bərəkətindəndir”. Uşaq pulu almaq üçün bir 19 yanvar mitinqi lazımdır ki, İlham Əliyev “səxavət (oxu korrupsiya) kisəsinin” ağzını açısın və Azərbaycan uşaqlarının 15 ildir mənimsədiyi halal haqqını özlərinə qaytarsın. Bunun üçün əlbəttə uşaqlarına çörək tapa bilməyən valideyinləri gərək meydanlarda olsun. Necə deyərlər müstəbidlik ölkələrində “ağlamayan uşağa süd verməzlər”.