İctimai fəal Bəxtiyar Hacıyev
Erdoğanın Şuşa səfəri ilə bağlı reportajda AzTV Bilal Erdoğanla İlham Əliyev arasında bu dialoq hissəsini kəsmişdi:
- Hankendi onların büyük şehri dimi? Hankendi.
- Evet.
AZTV-nin söhbətin bir hissəsini kəsməsi hiss olunurdu. Sonra HaberGlobal (Rövnəq müəllimin kanalı) bu hissənin olduğu tam dialoqu yaydı. Gecə sosial şəbəkələrdə paylaşılan kimi dərhal o videonu tamamən sildi.
Maraqlıdır, gizlədəcək bir şey yoxdursa, AZTV niyə kəsir, HaberGlobal niyə videonu silir?
İlham Əliyev 10 noyabr üçtərəfli bəyanatı ilə münaqişənin bitdiyini deyir, orada isə Xankəndinin və erməni nəzarətində digər ərazilərin taleyi barədə bir maddə yoxdur.
Kimsə “İlham Əliyev hər şeyin ən doğrusunu biləndir, ən doğru addım atandır, onun nəyi, nə vaxt, necə etməli olduğunu bilən ən böyük insandır, ona güvənirəm” deyə bilər, özü bilər. Mən güvənmirəm. Bunun üçün də yüzlərlə səbəbim var.
Kimsə “İlham Əliyevin Azərbaycan ərazi bütöylüyünü təmin edib” ifadəsinə şübhəsiz inana bilər, mən inanmıram, sorğulayıram. “O zaman müharibə cinayətkarı Arayik Arutyunyanın Xankəndidə nə işi var? Erməni və rus rəsmilər Azərbaycanın icazəsi olmadan, Azərbaycana xəbər vermədən Xankəndinə necə gedirlər?” soruşuram.
Kimsə özünü qul, rəiyyət, İlham Əliyevi isə şah, padşah saya bilər. Mən özümü vətəndaş sayıram və prezidentlərin vətəndaşlar üzərində ağa olmasına yox, vətəndaşların prezidentlər üzərində hökmü olduğunu, prezidentlərin vətəndaşlara xidmət etməli olduqlarına inanıram.
İnanın ki, bəzi sualları qaldırmaq elə də xoş deyil, rəiyyət olmaq və “Yaşasın Ali Baş Komandan, artıq biz Şuşaya Xankəndidən keçən köhnə yolla yox, Füzuli-Şuşa müasir yolları ilə gedəcəyik. Naşükür olmayaq, dünənə qədər Şuşa xəyal idi, bu gün orada Bravo tikilir” kimi yapvari pafos dolu şüarlar da yaza bilərəm.
Amma mən təkrar soruşuram, İ.Əliyevin Xankəndi mövzusunda baxışlarında gizlədiləcək bir şey yoxdursa, AZTV niyə kəsir, “HaberGlobal”a niyə video sildirirlər? Münaqişə bitibsə, ərazi bütövlüyümüz təmin edilibsə, Arayik Arutyunyan kimi müharibə cinayətkarlarının Xankəndində nə işi var?
İlham Əliyev erməni separatçıların nəzarətində qalan rayon və kəndlərin Azərbaycan nəzarətinə nə vaxt qaytarılacağı ilə bağlı qrafiki niyə açıqlamır? Qrafik açıqlasın, bağlansın bu mövzu.