İctimai fəal Bəxtiyar Hacıyev
Bu gün hakim Rauf Daşdəmirovun 1 saatlıq iclasdan sonra “şikayətdə imzalandığı yer göstərilməyib, ona görə icraata qəbul etmirəm” deməsi mənə bir neçə hadisəni xatırlatdı:
1) 2009-cu ildə qısa müddət Minskdə yaşayırdım. Təcili Macarıstana getməli oldum. Tələbə kimi ABŞ-da qalmaq icazəm, vətəndaş kimi Azərbaycan pasportum vardı. Səfirlikdə bir pəncərədə həyatdan küsmüş bir qadın topa-topa kağızların arasından hansısa konvensiyanı çıxarıb, bir maddəni göstərib, “siz ya ABŞ-da, ya da Azərbaycanda müraciət etməlisiniz, heç cür olmaz, qadağandır, mümkün deyil” dedi, dirəndi. Dəfələrlə izah etsəm də, anlamadı. Yan pəncərədə gülərüz xanım göz vurdu, çağırdı, konsulla danışdı, konsul qəbul etdi, növbəti gün vizamı verdi. Konvensiya həmin konvensiya idi, baxan adamlar fərqli idi.
2) 2010-da deputatlığa namizəd kimi təqdim etdiyim sənədlər arasında son iş yerim Dünya Bankı ilə elektron imzalanmış müqavilə vardı. Qəbul etmirdilər ki, burada “göy rəngdə mürəkkəblə vurulmuş möhür” yoxdur. O zaman elektron imza haqqında qanun artıq 5 ildir qüvvədə idi, amma işləmirdi. Atam “poçta faksla göndər” dedi, göndərdim. Poçt qəbul edəndə üzərinə tarix və indeks yazılmış möhür vurdu, o sənədin tərcüməsi isə notariusda təsdiq edildi, oldu normal sənəd. Amma mən məhkəməyə müraciət etdim, Ədliyyə Nazirliyini sıxdım, bir müddət sonra elektron imzalar tətbiqinə başlanıldı. Yeni qanun qəbul edilmədi, mövcud qanun işə düşdü.
3) 2016-cı ilə qədər şəhərdə dayanma-durma qaydalarını pozan avtomobillər evakuasiya edilirdi. Təkcə Caspian Plaza qarşısından bəlkə də gündə 50-100 maşın aparılırdı. Haradasa kimsə 5 dəqiqə saxlayanda “burada saxlama, aparırlar” deyilirdi. Heç kim “niyə aparılmalıdır ki?” demirdi. O vaxt bir neçə dəfə DYP ilə ciddi toqquşmamız baş verdi, məsələni arayış şəklində bir neçə yerə, o cümlədən şəxsən tanıdığım şəxslər vasitəsilə prezidentə göndərdim. Qısa müddət sonra evakuatorlar maşın qaçırmağa son verdilər. Nəzəri heç nə dəyişmədi, praktika dəyişdi.
Azərbaycanda həm təhsil sistemində, həm gündəlik həyatda, həm iş həyatında hamı qaydaları hərfi mənada anlayır, oxuyur, tətbiq edir. Hamı “NƏ?” sualına daha çox köklənir, nəinki “NİYƏ?” sualına.
Məsələn, fizika oxuyan birindən termodinamikanın, yaxud elektromaqnit induksiyası qaydalarını soruşsanız, əzbər deyərlər. Faradey qanunu, Lenz qanunu… Amma desən ki, yerin cazibə qüvvəsi mərkəzə doğru yox, əks tərəfə olsaydı, bu qanunlar necə dəyişərdi, dayanıb baxarlar. Yaxud kürənin həcminin düsturunu soruşsanız, əksəriyyət əzbər deyər. Amma niyə belə olduğunu, necə hesablandığını soruşsanız, donub qalarlar.
Məhkəmə-hüquq sistemində də, hüquq-mühafizə orqanlarının yanaşmasında da bu əzbərçiliyi, dərinə getmədən dayaz hərfi yanaşmanı müşahidə edirik. Heç kim status-kvonu gücə salıb, komfort zonadan çıxıb, nəyisə dəyişdirməyə cəhd etmir. “Belə yazılıb, elə də olmalıdır” deyirlər. Xüsusilə də vətəndaşın xeyrinə məsələlər dəyişmir, amma vətəndaşın ziyanına olan məsələlərdə qanunlar nöqtəsinə qədər tətbiq edilir.
Məsələn, milyonlarla sürücülük vəsiqəsini pulla satmış və satmağa davam edən DYP-nin inspektoru sürücünü “STOP nişanında təkər tam dayanmadı, cərimələnirsiniz” deyib cərimələyə bilir.
Yaxud 1000 manatı hədə-qorxu ilə tələb edərkən (“1000 manat ver, yoxsa sənin haqqında rüsvayedici məlumat yayaram” deyərək) cinayət tərkibi yarandığı deyilir, ancaq kiminsə övladı, yaxud ev heyvanı bu şəkildə tələb ediləndə “mülkiyyətə yönəlməyib, cinayət tərkibi yoxdur” deyilə bilir.
Yaxud kiminsə 1000 manatını cibindən oğurlamaq cinayət sayılır, amma bir vətəndaş bir məmuru məhkəməyə verib, süründürməçiliyə görə 3 ay vaxtının oğurlandığını desə, “cinayət tərkibi yoxdur” deyə bilirlər. Halbuki, kiminsə həyatının 3 ayı 1000 manatdan daha dəyərlidir.
Məhkəmələrdə işlərə baxırsan, hakimlər də, vəkillərin əksəriyyəti də mülk, aliment, boşanma, kredit, borc məsələləri kimi standart çərçivələrdən kənara çıxmağa sanki heç cəhd də etmirlər. Komfort zonada qalmağa üstünlük verirlər.
Halbuki, hüquqi dövlətin qurulması üçün sərhədlər çölə doğru sıxılmalı, genişləndirilməlidir, nəinki yazılmış qanunlar, qaydalar, məcəllələr, təlimatlar nöqtəsinə qədər tətbiq edilməli.
Yeri gəlmişkən, sabah prezidenti cavabdeh olaraq qoyduğum şikayətə Bakı Apellyasiya Məhkəməsində baxılacaq. Xüsusi bir gözləntim yoxdur, formal olaraq söhbətləşəcəklər, sonra ard-arda düzülüb, sağa-sola yırğalanaraq müşavirə otağına girib, 10 dəqiqə orada “başı xarabdır, prezidenti də məhkəməyə verərlər?” müzakirəsi edib, sonra çıxıb “təmin edilməsin” deyəcəklər. Ancaq hüquqi dövlətin qurulması, hüququn çərçivələrinin genişləndirilməsi üçün vacib prosesdir. Həm də Avropa İnsan Hüquqları Məhkəməsi üçün maraqlı iş olacaq.