Artıq bir neçə gündür siyasi məhbus, AXCP fəalı Zamin (Əlizamin) Salayev barəsində narahatlıq doğuran məlumatlar gəlməkdədir. Onun qanunsuz olaraq saxlanıldığı 17 saylı cəzaçəkmə müəssisəsində cərimə kamerasına (“kars”) salındığı və ona işgəncə verildiyi deyilir. Bildirilir ki, Zamin Salayev hakimiyyət nümayəndələrinin ona təklif etdiyi hansısa sənədə qol çəkmədiyi üçün cəzalandırılır. Görünür, hakimiyyət Zamin Salayevi siyasi əqidəsindən imtinaya və ya ona atılan böhtanı cinayət kimi boynuna almağa məcbur etmək istəyir.
AXCP Zamin Salayevə qarşı edilənləri hiddətlə pisləyir və bu qanunsuz əməllərin dərhal dayandırılmasını tələb edir. AXCP bildirir ki, şərlənərək həbs edilmiş Zamin Salayevin cəzaçəkmə müəssisəsində başına gətirilənlərə görə məsuliyyəti birbaşa siyasi hakimiyyət, şəxsən İlham Əliyev daşıyır. Zamin Salayevə qarşı təzyiqlər dərhal dayandırılmalı və onun hüquqları bərpa olunub, qorunmalıdır.
AXCP ölkə ictimaiyyətini Zamin Salayevin başına gətirilənlərə, eləcə də bütün siyasi məhbusların taleyinə biganə qalmamağa, etiraz səsini ucaltmağa çağırır.
AXCP beynəlxalq birliyə, hüquq müdafiə təşkilatlarına müraciət edərək, Zamin Salayevin taleyi ilə bağlı konkret addımlar atmağa səsləyir.