Azərbaycan Xarici işlər nazirliyi Fransanın Overn-Rona-Alplar bölgəsinin regional şurası sədrinin Ermənstanda verdiyi açıqlamasına etirazını bildirib.
Nazirliyin sözçüsü Ayxan Hacızadə mətbuata açıqlamasında deyib ki, fransalı nümayəndənin “qondarma separatçı rejimin “nümayəndəsi” ilə qeyd edilən görüş”… “Azərbaycanın suverenliyi və ərazı bütövlüyünə qarşı fəaliyyət kimi qiymətləndirilir.”
Mətbuat katibinə görə, “Fransanın rəsmi qurumları bu kimi təhrikçi və təxribatçı fəaliyyətlərə son qoymalıdır.”
Ermənistanda səfərdə olan Fransanın Overn-Rona-Alplar bölgəsinin regional şurasının sədri Loran Vokye Qarabağdakı separatçı rejimin “xarici işlər naziri” ilə görüşüb.
Yerevanda keçirilən görüşdə Fransa rəsmisi təmsil etdiyi regionun dəstəyi və bayrağı altında və həm də Fransanın erməni icmasının təşkilatları ilə birgə humanitar yardım konvoyunun Laçın yolundan keçirəcəyini bildirib.
Azadtutyun xəbər verir ki, martın 31-də fransalı məmuru Ermənistanın baş naziri Nikol Paşinyan da qəbul edib. Qeyd olunur ki, tərəflər Sönik bölgəsindəki proqram çərçivəsində əməkdaşlığa toxunublər.
Sünikdə olan Loran Vokye deyib ki, o özünün bu səfəri ilə dünyaya göstərmək istəyir ki, Fransa ona dost ölkə olan Ermənistanın yanındadır.
2022-ci il avqustun 26-da Azərbaycan Laçın şəhərini nəzarətə götürmüşdü. Həmin məsələ barədə Prezident İlham Əliyev Twitter səhifəsində paylaşım etmişdi: “…Azərbaycan ordusu Laçın şəhərinə yerləşdi. Zabux və Sus kəndləri nəzarətə götürüldü”.
2020-ci ildə, 44 günlük İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona (Laçın rayonu qismən) nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində (Laçın rayonu Ermənistanla sərhəddə yerləşir) və Qarabağdakı təmas xəttində Rusiya sülhməramlıları yerləşdirilib. Amma 5-kilometrlik bu dəhliz Laçın şəhərinə və bu rayonun Zabux, Sus kəndlərinə düşdüyündən onlara Azərbaycan nəzarət etmirdi.
Bununla belə, Azərbaycan, üçtərəfli sazişə əsasən, Laçın şəhərindən yan keçən əvvəlki dəhlizə alternativ yol çəkib. Bu yol da Ermənistanla Azərbaycanın Xankəndi şəhərini birləşdirir. Yolun Ermənistan tərəfinə düşən hissəsində isə inşa işlərinin davam etdiyi açıqlanırdı.
Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.
Azadlıq radiosu