Milli Şuranın sədri, professor Cəmil Həsənli
Bunlar tarixi şumlaya-şumlaya gedirlər. Bir-iki gün əvvəl “Azərbaycan” qəzetində Milli Məclisin energetika və ekologiya komitəsinin sədri Sadıq Qurbanovun Heydər Əliyev haqqında “Ziyalıların böyük himayədarı” adlı yazısı çıxıb. Sadıq Qurbanov texnika üzrə fəlsəfə doktorudur. Amma tarixin daşın daş üstə qoymur.
Sadıq müəllim Sovet dissidentliyindən (Soljenitsin, Saxarov, Rastropoviç) yazandan sonra Bəxtiyar Vahabzadənin “Gülüstan” poemasına dönür və yazır: “Azərbaycanda da ötən əsrin 60-70-ci illəri milli hisslərin coşduğu bir dövr idi. Heydər Əliyevin rəhbər kimi ana dilində danışması, ziyalıları himayə etməsi milli hissləri daha da coşdururdu. Xalq şairi Bəxtiyar Vahabzadənin 1958-ci ildə Şəkinin “İpəkçi” qəzetində çap olunan “Gülüstan” poemasında milli azadlıq və müstəqillik ideyaları aşılanırdı. Poema getdikcə populyarlıq qazanır və əl-əl gəzirdi. Heydər Əliyevin hakimiyyəti dönəmində “Gülüstan” poeması həddindən artıq geniş yayılmışdı”.
Gördüyünüz bu beş cümlədə beş səhv var. Birincisi, Bəxtiyar müəllimin “Gülüstan” poeması 1958-ci ildə yox, 1960-cı ilin oktyabr ayında çap olunub.
İkincisi, bu poema Şəkinin “İpəkçi” qəzetində yox, “Nuxa fəhləsi” qəzetinin 1960-cı il 23 və 26 oktyabr nömrələrində dərc edilib. Deyək humanitar sahəyə bələd olmayan Sadıq Qurbanov bunu bilmir, bəs yazını dərc edən “Azərbaycan” qəzetində hər kəsə bəlli olan bu faktın təhrifinə niyə yol verilir.
Üçüncüsü, rəhbərliyə gələndən sonra “Heydər Əliyevin rəhbər kimi ana dilində danışması” müəllifin uydurmasıdır. Əslində Heydər Əliyev 1969-cu ildə rəhbərliyə gələndən sonra respublika partiya təşkilatında bütün yazışmaları və müzakirələri rus dilində keçirdi. Hətta respublika daxilində olan bütün idarə-müəssisələrə göstəriş verildi ki, Mərkəzi Komitəyə məktubları rus dilində göndərsinlər. Yalnız Yazıçılar İttifaqı bu göstərişə riayət etmədi. İttifaqın sədri Mirzə İbrahimov MK şöbəsinə bildirdi ki, nə qədər mən bu İttifaqın rəhbəriyəm buradan respublika daxilinə, o cümlədən MK-ya da gedən məktublar Azərbaycan dilində yazılacaq.
Dördüncüsü, “60-70-ci illər milli hislərin coşduğu bir dövr idi” fikrinə gəldikdə bu belə idi. Amma Heydər Əliyev 1971-ci ilin oktyabr ayının 29-da Azərbaycan KP MK-nın plenumunda “Sov.İKP XXIV qurultayının qərarları ilə əlaqədar olaraq ideoloji işi daha da gücləndirmək sahəsində respublika partiya təşkilatının vəzifələri haqqında” məruzəsi ilə 60-cı illərdə coşan o “milli hislərin” üzərindən çalın çarpaz bir xətt çəkdi. Bunun üçün həmin məruzənin 1971-ci ilin noyabrın 2-də “Kommunist” qəzetindəki qısaldılmış mətninə baxmaq yetərlidir. Həmin məruzədəki tənqiddən sonra Bəstəkarlar İttifaqının sədri Qara Qarayev Azərbaycandan getməli oldu, Ensiklopediyanın 20 min tirajla nəşr edilmiş birinci cildi hər yerdən yığışdırılıb məhv edildi, “Qobustan” jurnalı türkçülüyü yaymaqda ittiham edildi, “Bir Cənub şəhərində” filmi ekranlardan yığışdırıldı, Maqsud İbrahimbəyovun “Günlərin bir günündə” hekayəsi antisovet ədəbiyyat elan edildi, Firudin Şuşinskinin “Şuşa” kitabı kəskin tənqid edildi, Sabir Əhmədovun “sosializm quruculuğu və kolxoz həyatını” təhrif edən “Dünyanın arşını” romanına pelenumda tənqid edildiyinə görə 10 ilə heç yerdə çap olunmadı, adları məruzəyə düşdüyü üçün tanınmış tarixçilər Ziya Bünyadov, Mahmud İsmayılov, Süleyman Əliyarovun təqibi başladı, vəfat etmiş anasını molla ilə dəfn etdiyinə görə bəstəkar Musa Mirzəyevin məsələsi Bəstəkarlar İttifaqının partiya təşkilatında müzakirə edildi, “Təzə Pir” məscidinin yanından keçəndə nəzir verdiyinə görə akademiyanın müxbir üzvü Cümşüd Zülfüqarlı Universitetdə işini itirmək təhlükəsi ilə üzləşdi və sair. İndi bütün bunlar ziyalılara qayğı kimi göstərilir. Bəs onda bütün bu olanları tarixdən silib, texnika üzrə fəlsəfə doktorunun qələmi ilə yenidən tarixi yazmaq lazımdır? Fakt ortaya qoyanda da bunları “qoruyucu tənqid” adlandırırlar. Nə isə!?
Beşincisi, “Heydər Əliyevin hakimiyyəti dönəmində “Gülüstan” poeması həddindən artıq geniş yayılmışdı” fikri kökündən səhvdir. Heydər Əliyev hakimiyyətə gələndə heç “Gülüstan” poemasının izi-tozu da qalmamışdı. “Gülüstan” 1960-cı ildə dərc edilsə də, onun tənqidi 1963-cü ildə geniş xarakter aldı və ideoloji işlər üzrə MK katibi Xasay Vəzirov 1963-cü ildə Elmlər Akademiyasında keçirilən müşavirədə dedi ki, bəzi şairlərimiz öz əsərlərini əyalətdə çıxan gizli mətbuatda dərc etdirir. Bu da gülüş doğurdu. “Nuxa fəhləsi” haçandan gizli mətbuat idi? Həmin ilin noyabrında Azərbaycan ziyalılarının müşavirəsində o, yenidən bu məsələyə qayıtdı və poemanı sərt tənqid etdi.
Guya bu poemaya görə Bəxtiyar Vahabzadəni DTK həbs etməli imiş, onu Heydər Əliyev xilas edib fikri də kökündən səhvdir. 60-cı illərdə Partiya qərarı olmasaydı DTK Bəxtiyar Vahabzadə, Xəlil Rza kimi adamları həbs edə bilməzdi. Ümumiyyətlə, nə Bəxtiyar müəllimin, nə də Xəlil Rzanın həbsi (1990-cı il istisna olmaqla) Sovet dövründə heç vaxt gündəlikdə olmayıb.
Andrey Saxarova gəldikdə isə onun məsələsi, xüsusi ilə xaricilərlə görüşünə qadağa qoyulması Siyasi Büroda müzakirə olunanda Heydər Əliyev də ona qarşı çıxış edib. Bunlar Siyasi Büronun iclaslarının protokollarında var.